Tvö nýleg hús sem stóðu á Berginu í Reykjanesbæ við smábátahöfnina hafa verið rifin. Húsin voru byggð árið 2000 og voru svokölluð Kanadahús – verksmiðjuframleidd einingahús frá Kanada. Eitt þessara húsa, sem stóð við Bakkaveg 19, var stórt og myndarlegt íbúðarhús, sem búið var að byggja við og hefur á síðustu árum verið rekið sem hótel.
Frá þessu er greint á vef Víkurfrétta en eigandi lóðarinnar er félagið Gistiver sem er í eigu Hreiðar Más Sigurðssonar og fjölskyldu. Hreiðar Már keypti lítið lúxushótel á þessum reit í september á síðasta ári og þykir ljóst að hann stefnir á að stækka það til muna.
Hreiðar Már ætlar því að byggja nýtt hótel á þessum reit og ákvað þess vegna að rífa bæði húsin í stað þess að bæta við viðbygginguna á milli þeirra, sem var byggð fyrir fyrir nokkrum árum. Fyrsta húsið, Bakkavegur 19, fékk að fjúka fyrir nokkru síðan og vöktu niðurrifin mikla athygli enda húsið um 300 fermetrar að stærð, og á tveimur hæðum. Samkvæmt Víkurfréttum var grind hússins varðveitt en annað fór á haugana. Í framhaldinu var síðan ráðist í byggingu hótels á lóðinni.
Stórtækur í ferðaþjónustunni
Í þessari viku var svo Bakkavegur 17 rifinn en á vef Víkurfrétta er greint frá því að húsið hafi orðið að tengibyggingu á milli tveggja hótelbygginga. Á þeim forsendum fékk Hreiðar Már leyfi til að rífa húsið og byggja nýja og hentugri tengingu á milli húsanna sem eiga að hýsa hótelið.
Húsin þóttu glæsileg á þeim tíma sem þau voru byggð og var eitt annað meðal annars notað sem heimili þeirra stúlkna sem tóku þátt í íslenska Bachelor-þættinum árið 2005.
Samkvæmt frétt Morgunblaðsins frá því fyrr á þessu ári þá hefur Hreiðar Már byggt hratt upp fyrirtækið Gistiver og tengist félagið nú rekstri sjö gististaða víðsvegar um landið. Þrír þessara gististaða eru í Stykkishólmi en hinir fjórir á Nesjavöllum, Búðum, í Keflavík og Reykjavík.
Athugasemd við fréttina:
Hreiðar Már Sigurðsson hafði samband við Stundina og vildi koma á framfæri upplýsingum um framkvæmdirnar á Berginu í Reykjanesbæ.
„Í fyrsta lagi höfum við ekki rifið tvö hús. Þegar við kaupum Hótel Berg fyrir rúmlega ári síðan var búið að rífa Bakkaveg 19 og komum við þar hvergi nærri,“ segir Hreiðar Már sem einnig vildi koma því á framfæri að eiginkona hans er ekki framkvæmdastjóri Gistivers.
„Í öðru lagi þá er eiginkonan mín ekki framkvæmdastjóri Gistivers. Framkvæmdastjóri Gistivers er Björg Bára Halldórsdóttir og hægt að finna upplýsingar um það á heimasíðu félagsins www.gistiver.is.“
Þá segir Hreiðar Már að það sé sjálfsagt að upplýsa það, til að koma í veg fyrir misskilning, að Bakkavegur 17 var rifinn þar sem það hús var Kanadahús og ekki möguleiki fyrir félagið að byggja aðra hæð ofan á svo veikburða hús.
„Eins fannst mygla í hluta hússins þegar framkvæmdir hófust og lítið annað í stöðunni en að rífa húsið fyrir nýbyggingu ef við ætluðum að halda áfram hótelrekstri í húsinu. Með núverandi framkvæmdum er ætlun okkar að auka gæði Hótels Bergs og hagkvæmni hótelsins með því að fjölga herbergjum úr 18 í 38.“
Athugasemdir