Lögmaður Sónar Reykja­vík ehf, sem árlega stendur fyrir tón­list­ar­há­tíð­inni Sónar Reykja­vík, hefur sent stjórn ÚTÓN, Útflutn­ings­skrif­stofu íslenskrar tón­listar, og Illuga Gunn­ars­syni, mennta- og menn­ing­ar­ráð­herra, form­lega kvörtun fyrir hönd félags­ins vegna fram­göngu Sig­tryggs Bald­urs­sonar, fram­kvæmda­stjóra ÚTON. For­svars­maður Sónar er Björn Stein­bekk. Stundin hefur umrætt bréf undir höndum. Þar kemur fram að Björn og Sig­tryggur hafi átt í tölvu­póst­sam­skiptum þar sem hinn síð­ar­nefndi hafi látið falla ýmis ummæli sem að mati Björns telj­ast æru­meið­andi í garð hans. Björn dragi í efa að þau sam­ræm­ist starfs­skyldum fram­kvæmda­stjóra ÚTÓN.

Þrátt fyrir ítrek­aðar til­raunir náð­ist ekki í Sigtrygg við vinnslu frétt­ar­innar.

ÚTÓN eru frjáls félaga­sam­tök sem komið var á lagg­irnar af mennta- og menn­ing­ar­mála­ráðu­neyt­inu. Starf­semi ÚTÓN er meðal ann­ars fjár­mögn­uðu á grund­velli fjár­laga og úthlutar styrkjum úr Útflutn­ings­sjóði íslenskrar tón­listar ár hvert. ÚTÓN er enn fremur ætlað að vera milli­liður tón­list­ar­manna þegar kemur að  land­kynn­ingu á vegum Íslands­stofu. Því er starf­semi ÚTÓN í raun opin­bers eðlis.

Björn lýsir enn fremur áhyggjum af eign­ar­haldi tón­list­ar­há­tíð­ar­innar Iceland Airwaves en hún er alfarið í eigu ÚTÓN. Hann telur að það geti haft nei­kvæð áhrif á kynn­ingu ann­arra tón­list­ar­há­tíða á Íslandi.   

Samkrull ríkis og hagsmunaaðila

Ólíkt Sónar Reykja­vík, ATP og Secret Solstice er Iceland Airwaves tón­list­ar­há­tíðin í raun rekin af rík­inu. Rekstr­ar­að­ili hátíð­ar­innar er IA tón­list­ar­há­tíð ehf. Samkvæmt árs­reikn­ingi frá árinu 2014 er eini eig­andi þess ÚTÓN, sem er líkt og fyrr segir nær alfarið rekið á fjár­lögum frá rík­inu. Þess má geta að Iceland Airwaves og ÚTÓN halda úti sam­eig­in­legri skrif­stofu. Icelandair styrkir hátíð­ina einnig um háar upp­hæðir og á vöru­merkið Iceland Airwaves, en hátíðin sjálf er hvorki rekin af né í eigu flug­fé­lags­ins.

Tón­list­ar­há­tíðin Iceland Airwaves er því í raun hálf­gert rík­is­fyr­ir­tæki.

Samkvæmt meist­ara­rit­gerð Tómasar Young, sem síðar varð starfs­maður ÚTÓN, frá árinu 2010, var ÚTÓN stofnað árið 2006 af Lands­banka Íslands, Útflutn­ings­ráði Íslands og Samtóni, sam­tökum tón­list­ar­rétt­hafa. Lands­bank­inn dró sig úr sam­starf­inu árið 2008 og Útflutn­ings­ráð Íslands varð að Íslands­stofu. Þar af leið­andi er ÚTÓN nær alfarið rekið fyrir fé sem kemur með einum eða öðrum hætti úr rík­is­sjóði. Samkvæmt þess­ari sömu rit­gerð var ÚTÓN rekið árið 2010 fyrir fjár­fram­lag frá stofn­að­ilum, auk fjár­fram­laga frá utan­rík­is­ráðu­neyti, mennta­mála­ráðu­neyti og iðn­að­ar­ráðu­neyti.