„Einhvern daginn kemur að því að manni þyki nóg komið af þessum skrifum – eða blaðinu – en það er óneitanlega skemmtilegra að enda svo langa og ánægjulega samfylgd með öðrum hætti en þessum,“ skrifar Guðmundur Andri Thorsson rithöfundur í föstum pistli í Fréttablaðinu í morgun. Hér er hann að tala um þá staðreynd að í síðustu viku var pistli hans sleppt úr blaðinu og í stað birtur pistill eiginmanns aðaleiganda 365, Jóns Ásgeirs Jóhannessonar. „Mér hefur verið sagt að þar hafi verið um mistök að ræða og ég tek til greina skýringar ritstjórnar. Óþarfi að gera meira veður út af því,“ skrifar rithöfundurinn. 

Gagnrýnir ritstjóra

Guðmundur Andri gerir grein Jóns Ásgeirs, þar sem hann gagnrýnir dómstóla og sérstakan saksóknara vegna dómsmáls gegn honum sjálfum, að umfjöllunarefni í pistli sínum. „Hins vegar má lesa grein Jóns Ásgeirs í samhengi við ýmsar aðrar greinar, fréttir og frásagnir sem saman mynda nokkurs konar „Allsherjarsögu“ sem haldið er að okkur um þessar mundir á ýmsum vettvangi. Sagan er eitthvað á þá leið að sérstakur saksóknari standi fyrir ofsóknum á hendur fyrrverandi bankamönnum og athafnamönnum og Hæstiréttur Íslands taki þátt í þeim, til að friða blóðþyrstan almenning – og náttúrlega Evu Joly, það voðalega kvendi sem stundum er nefnd til sögunnar sem helsti skúrkur Hrunmálanna. Geirfinnsmálið hefur þráfaldlega verið nefnt til samanburðar af talsmönnum sakborninga, nú síðast Eggerti Skúlasyni,“ skrifar Guðmundur Andri. Þess má geta að Kristín Þorsteinsdóttir, aðalritstjóri 365, er ein þeirra sem hefur líkt rannsóknum sérstaks saksóknara við Geirfinnsmálið. Þá hefur hún einnig gagnrýnt sérstakan saksóknara og Hæstarétt fyrir rannsóknir og dóma í efnahagsbrotamálum, meðal annars á meintum brotum Jóns Ásgeirs.