Engar aðhaldsráðstafanir eru gerðar vegna almanna- og atvinnuleysistrygginga og menntamála og heilbrigðisstofnana í fjárlögum ársins 2016. Þetta kemur fram í kynningarefni sem dreift var á blaðamannafundi í Hörpu í hádeginu.

„Framlög til heilbrigðismála aukast um 1,6 mia. kr., s.s. með styrkingu á rekstrargrunni sjúkrahúsa og heilbrigðisstofnana, auknum framlögum til heilsugæslunnar og til framkvæmdaáætlunar um byggingu nýrra hjúkrunarheimila. Jafnframt er gert ráð fyrir framlögum til að ljúka hönnun meðferðarkjarna Landspítala og byggingu sjúkrahótels,“ segir í tilkynningu.

Þetta þýðir að ríkisstjórnin hefur ákveðið að falla frá þeirri aðhaldskröfu sem til stóð að gerð yrði í heilbrigðiskerfinu og menntakerfinu, líkt og Bjarni Benediktsson greindi frá í viðtali við Morgunblaðið og Stundin fjallaði um fyrr í sumar. 

Stutt er við nýsköpun og vísindi með auknum framlögum. Sú aukningin nemur 2 milljörðum. Þá eru framlög til framhaldsfræðslu og starfsmenntunar aukin samhliða því að ný framlög eru veitt til átaks til að efla lestrarkunnáttu barna. Verða sérstök framlög veitt til að stofna embætti héraðssaksóknara sem miðar að því að skjóta styrkari stoðum undir ákæruvald í landinu og auka málshraða.

Fjallað verður ítarlega um fjárlagafrumvarpið hér á vefnum í dag.