Karl Sigurðsson, fyrrverandi borgarfulltrúi Besta flokksins og stjórnarmaður og frambjóðandi Bjartrar framtíðar, segir að hann fái „illt í magann“ yfir umræðu um Óttarr Proppé, formann Bjartrar framtíðar, eftir að Óttarr ákvað að ganga til formlegra viðræðna um myndun ríkisstjórnar með Sjálfstæðisflokki og Viðreisn.

Karl birti færslu á Facebook í kvöld til varnar Óttarri og mannkostum hans. 

„Það sem mér svíður hins vegar alveg ofboðslega um þessar mundir er hvernig fólk leyfir sér að tala um Óttar bara vegna þess að hann leyfir sér að kanna möguleikann á samstarfi með þeim sem fengu stjórnarmyndunarumboðið frá forsetanum. Orðbragðið sem er notað víða er svo ósmekklegt að ég fæ bara illt í magann og er skapi næst fara í þá rassíu að henda sumum út af vinalistanum mínum.“

Karl tekur ekki dæmi um orðbragð í garð Óttarrs.

Björt framtíð er í oddastöðu við myndun ríkisstjórnar eftir að flokkar hafa útiokað hver annan. Flokkurinn hafði rætt við Pírata, Samfylkingu og Vinstri græna um myndun bandalags fyrir kosningar og var lögð fram viljayfirlýsing um samstarf í kjölfar þess. Eftir kosningar tilkynnti Óttarr Proppé að Björt framtíð færi með Viðreisn á fund Bjarna Benediktssonar og að flokkarnir tveir yrðu samstíga í viðræðum um myndun mögulegrar ríkisstjórnar.

Ríkisstjórn miðjuflokksins Bjartrar framtíðar með Viðreisn og Sjálfstæðisflokki yrði sú fyrsta í sögunni með tvo hægri flokkka og má gera ráð fyrir því að hún yrði hægrisinnaðasta ríkisstjórn lýðveldissögunnar. Karl segist hafa skilning á því að Björt framtíð vinni nú að myndun hægri stjórnar. 

„Í mínum huga væri galið að segja bara þvert nei við þessum samræðum og fullkomlega eðlilegt að kanna hvað fólk hefur að segja og hvort mögulegt er að ná fram stefnumálum BF í ríkisstjórn með þessum flokkum - og ef svo er ekki, þá bara sleppa þessu. Við verðum allavega að vera viss um að þetta hafi verið skoðað til hlítar áður en við blásum þetta af. Hvort fólk er sammála þessu er eitt en það er annað ef á að fara úthúða fólki fyrir að tala saman. Það er bara fávitaskapur.“

Færsla Karls í heild

Óttarr Proppé er einn besti maður sem ég þekki. Hann er vandaður, gáfaður, varkár, góðhjartaður og heiðarlegur. Allt frá því við sáum fram á að Besti flokkurinn yrði hluti af borgarstjórn hefur hann talað um mikilvægi þjónandi forystu og að setja almannahagsmuni umfram hagsmuni þröngra hópa og hann hefur hvergi vikið frá því viðhorfi sínu. Nú er hann í framlínu fólks af miðjunni sem er að ræða við hægri flokkana um hugsanlegt stjórnarsamstarf. Í mínum huga væri það ekki óskastaða en ég ætla að leyfa mér að leggja traust mitt í hendur Óttari og anda með nefinu þangað til eitthvað raunverulegt er að frétta úr þessum viðræðum.

Það sem mér svíður hins vegar alveg ofboðslega um þessar mundir er hvernig fólk leyfir sér að tala um Óttar bara vegna þess að hann leyfir sér að kanna möguleikann á samstarfi með þeim sem fengu stjórnarmyndunarumboðið frá forsetanum. Orðbragðið sem er notað víða er svo ósmekklegt að ég fæ bara illt í magann og er skapi næst fara í þá rassíu að henda sumum út af vinalistanum mínum.

Í mínum huga væri galið að segja bara þvert nei við þessum samræðum og fullkomlega eðlilegt að kanna hvað fólk hefur að segja og hvort mögulegt er að ná fram stefnumálum BF í ríkisstjórn með þessum flokkum - og ef svo er ekki, þá bara sleppa þessu. Við verðum allavega að vera viss um að þetta hafi verið skoðað til hlítar áður en við blásum þetta af. Hvort fólk er sammála þessu er eitt en það er annað ef á að fara úthúða fólki fyrir að tala saman. Það er bara fávitaskapur.