Ráð­stefnu­gestir streyma út úr Alandica-höll­inni út í nor­ræna sum­ar­sól. Ein­hverjir eru í bolum með myndum af vin­sælum per­sónum úr bóka­flokkum eða tölvu­leikjum en að öðru leyti gæti þetta verið óvenju ung­leg verk­fræð­inga- eða tann­lækna­ráð­stefna. Þetta eru þó ekki verk­fræð­ingar heldur fantasíu- og vís­inda­sagnanördar sem komnir eru í smá­þorpið (og á sama tíma höf­uð­borg­ina) Mar­íu­höfn á Álandseyjum til að taka þátt í stærsta furðu­sagna­þingi Norð­ur­land­anna, Archipelacon. Á meðal ráð­stefnu­gesta eru tveir íslenskir höf­undar sem eru komnir til að kynna bækur sínar og íslenskar furðu­sögur. Báðir hafa stóra bunka af bæk­lingum með kafla­brotum á bæði ensku og sænsku, sér­stak­lega þýdda fyrir þessa ráð­stefnu. Ég náði tali af þeim í lobbý­inu á ráð­stefnu­höll­inni, Emil Hjörvari Petersen og Alex­ander Dan Vil­hjáms­syni. Fyrsta deg­inum er nýlokið, en fram undan er langt prógram þar sem allt sem við­kemur furðu­sögum verður rætt, vís­inda­sögur, fantasíur, nor­ræn furða og fleira. George R.R. Martin, höf­undur bóka­flokks­ins sem þætt­irnir Game of Thrones eru byggðir á, mun árita bækur og lesa upp, margir þekktir höf­undar á Norð­ur­lönd­unum (og minna þekktir líka) munu taka þátt í pall­borðsum­ræðum sem snerta á tölvu­leikjum, kvik­myndum, finnskum hryll­ings­sögum og jafn­vel Grískir fantasíu­á­huga­menn eru með sér umræðu­vett­vang.