Tilkynnt hefur verið um nýjan ritstjóra hjá Eyjafréttum, stærsta fréttamiðli Vestmannaeyja.
Ritstjórinn, Sindri Ólafsson, er stjórnarmaður í sjálfstæðisfélagi Vestmannaeyja, fyrrverandi formaður ungra sjálfstæðismanna í Eyjum og eiginmaður oddvita Sjálfstæðisflokksins í bæjarstjórn, Hildar Sólveigar Sigurðardóttur.
Formaður nýrrar stjórnar útgáfufélagsins, sem ræður ritstjórann, er varabæjarfulltrúi Sjálfstæðisflokksins. Stjórn félagsins segir í tilkynningu að nýr ritstjóri eigi ekki að „gjalda fjölskyldutengsla“ og er boðuð aukin prentútgáfa Eyjafrétta vegna komandi ríkisstyrkja til fjölmiðla.
Þetta gerist í kjölfar þess að Ísfélagið í Vestmannaeyjum og Vinnslustöðin stækka við hlutafé sitt í fjölmiðlafyrirtækinu Eyjasýn. Sömu félög eiga stóran hlut í útgáfufélagi Morgunblaðsins.
Búast við ríkisstyrkjum
Útgáfufélag Eyjafrétta, Eyjasýn, hefur verið rekið með um fimm milljóna króna tapi á ári síðastliðin tvö ár.
Óuppfærður hluthafalisti er birtur á vef Fjölmiðlanefndar, en hann gefur ekki rétta mynd af núverandi eignarhaldi. Stærstu hluthafar eru Vinnslustöðin í Vestmannaeyjum og Ísfélagið í Vestmannaeyjum.
Af ársreikningi útgáfufélags Eyjafrétta, Eyjasýn ehf, sést að Ísfélagið hefur aukið hlut sinn úr 15% í 24% og Vinnslustöðin úr 13,5% í 21,6% á milli ára.
Þá hefur verið boðað að útgáfudögum prentblaðs Eyjafrétta verði fjölgað og komi blaðið út á tveggja vikna fresti í stað einu sinni á mánuði. Grundvöllurinn fyrir því, þrátt fyrir taprekstur, er boðaðir ríkisstyrkir til fjölmiðla, eins og segir í yfirlýsingu stjórnar Eyjasýnar:
„Slíkur stuðningur myndi styrkja stoðir Eyjasýnar líkt og annarra útgáfufélaga í svipaðri stöðu. Ekki síst með þetta í huga ákváðu eigendur Eyjasýnar að tryggja félaginu fjármuni til að marka útgáfunni breyttan farveg og gefa áfram út Eyjafréttir á 43 ára gamalli kennitölu!“
Stjórnin er skipuð þremur aðilum, og hafa tveir þeirra verið viðloðandi starf Sjálfstæðisflokksins í Vestmannaeyjum, en sá þriðji starfað að kynningarmálum fyrir Vinnslustöðina. Formaður stjórnarinnar er varabæjarfulltrúi Sjálfstæðisflokksins, Margrét Rós Ingólfsdóttir. Með henni í bæjarstjórn er Hildur Sólveig Sigurðardóttir, eiginkona nýs ritstjóra, Sindra Ólafssonar.
Búast við fagmennsku af hálfu ritstjórans
Í yfirlýsingu stjórnarinnar er sérstaklega rætt að nýr ritstjóri eigi ekki að gjalda fyrir fjölskyldutengsl sín inn í pólitík.
„Bæjarmálapólitíkin í Eyjum er á köflum býsna hvöss og einhver kann nú að velta fyrir sér hvernig fjölmiðill með ritstjóra, fjölskyldutengdan bæjarstjórninni, geti fjallað af hlutlægni um mál á þeim vettvangi? Eðlilegt að spurt sé og þeirri spurningunni veltum við eðlilega fyrir okkur í stjórninni og við nýjan ritstjóra sömuleiðis. Sindri treystir sér vel til að taka fagmannlega á hlutunum og við treystum honum fullkomlega. Hann hefur þekkingu og áhuga sem við sækjumst eftir og á ekki að gjalda fjölskyldutengslanna.“
„Hann hefur þekkingu og áhuga sem við sækjumst eftir og á ekki að gjalda fjölskyldutengslanna.“
Sjálfstæðisflokkurinn missti óvænt meirihluta sinn í Vestmannaeyjum í síðustu kosningum og fékk minnsta fylgi frá árinu 1986, eða 45,4 prósent atkvæða. Í kjölfarið mynduðu Eyjalistinn og flokkurinn Fyrir Heimaey meirihluta.
Ekki ljóst hvort hann víki úr stjórn
Nýr ritstjóri er sem fyrr segir stjórnarmaður í Sjálfstæðisfélagi Vestmannaeyja. Í fréttatilkynningu frá félaginu í febrúar síðastliðnum, sem nýráðinn ritstjóri undirritaði ásamt fjórum stjórnarmönnum, var Sjálfstæðisflokknum hrósað og flokkurinn hvattur til að „halda áfram á braut góðra verka“.
„Það er ánægjulegt að fylgjast með og verða vitni að því hvernig hin góðu verk og ákvarðanir Sjálfstæðismanna síðustu kjörtímabila verða að veruleika ... Aðalfundur Sjálfstæðisfélagsins hvetur bæjarfulltrúa Sjálfstæðisflokksins til að halda áfram á braut góðra verka. Það er mikilvægt að sá mikli kraftur sem í grasrót flokksins býr og drífur áfram flokksstarfið nái að skila sér í bættum hag bæjarbúa hér eftir sem áður fyrr,“ sagði meðal annars í fréttatilkynningunni. Ekki hefur komið fram hvort nýráðinn ritstjóri Eyjafrétta muni sitja áfram í stjórn Sjálfstæðisfélagsins.
Meðal fyrstu frétta í nýrri ritstjórn var viðtal við vin Sindra, Vilhjálm Árnason, þingmann Sjálfstæðisflokksins, um stöðu innanlandsflugs, en Vilhjálmur hefur óskað eftir fundi í umhverfis- og samgöngunefnd Alþingis vegna málsins.
„Blaðið er í öflugum höndum,“ sagði Vilhjálmur á Facebook-vegg Sindra í gær um ráðninguna.
Eiga einnig í Morgunblaðinu
Ísfélagið í Vestmannaeyjum á einnig stóran hlut í útgáfufélagi Morgunblaðsins, Árvakri, eða um 13,4%. Auk þess á stjórnarmaður í Ísfélaginu, Sigurbjörn Magnússon, 12,4% í Morgunblaðinu í gegnum félag sitt. Þá er Guðbjörg Matthíasdóttir, einn helsti eigandi Ísfélagins, eigandi að 16,5% hlut í Árvakri. Þannig eiga Ísfélagið og tengdir aðilar minnst 42,3 prósent í félaginu, en meðal annarra eigenda eru Eyþór Arnalds, oddviti Sjálfstæðisflokksins í Reykjavík, sem á rúm 20%, og Kaupfélag Skagfirðinga.
Nýir eigendur Morgunblaðsins árið 2009 skipuðu Davíð Oddsson, fyrrverandi formaður Sjálfstæðisflokksins, ritstjóra ásamt Haraldi Johannessen.
Athugasemdir