Kristinn Hrafnsson, ritstjóri WikiLeaks, greinir frá því að honum hafi borist til eyrna að fyrir um mánuði síðan, eða þann 6. maí, hafi lögreglumaður frá FBI komið til Íslands vegna rannsóknar á hendur Julian Assange og WikiLeaks. Með honum í för hafi verið saksóknari frá bandaríska dómsmálaráðuneytinu. Með aðstoð íslensku lögreglunnar hafi þeim tekist að hafa uppi á Sigurði Inga Þórðarsyni, og haft milligöngu um að leggja fyrir hann rannsóknarspurningar, áður en honum var flogið út til Bandaríkjanna þar sem hann dvaldi í boði þarlendra fram að síðustu helgi.
„Ég vænti þess að fleirum en mér þyki forvitnilegt að vita hvernig vera megi að íslensk yfirvöld veiti liðsinni sitt í pólitískum ofsóknum og ofstæki sem lýst hefur verið sem skelfilegustu aðför að frelsi fjölmiðla á Vesturlöndum og blaðamennsku í heiminum á síðari tímum. Þær ofsóknir beinast meðal annars að íslenskum ríkisborgurum,“ skrifar Kristinn í færslu sem hann birti á Facebook fyrr í kvöld. Þar greinir hann jafnframt frá því að hann hafi sent fyrirspurn á forsætisráðherra, utanríkisráðherra, dómsmálaráðherra, ríkissaksóknara og ríkislögreglustjóra. Fyrirspurn hans hafi ekki verið svarað.
Fleiri Íslendingar gætu flækst í málið
Í erindi Kristins krefst hann svara, meðal annars á þeim forsendum að sakarannsóknin gegn WikiLeaks beinist meðal annars að honum, auk þess sem fleiri Íslendingar gætu flækst inn í þá rannsókn.
„Fullyrt er að hingað til lands hafi komið tveir fulltrúar frá þessum embættum 6. maí s.l. og átt í samskiptum við Ríkislögreglustjórann og embætti Ríkissaksóknara sem mér er sagt að hafi haft milligöngu um samnngagerð við Sigurð Inga um að hann bæri vitni í téðri sakarannsókn gegn fullvissu um eigið friðhelgi. Fylgir sögunni að íslensk embætti hafi haft milligöngu um að útvega Sigðurði lögmann til að gæta hans hagsmuna. Í kjölfarið hafi Sigurður haldið til Bandaríkjanna þann 27. maí s.l. Og dvalið þar til 1. júní og gefið sinn vitnisburð sem innlegg í sakarannsóknina sem rekin er fyrir leynidómstól (Grand Jury) í austurhluta Virginíuríkis.“
Umræddur Sigurður er betur þekktur sem Siggi hakkari, en árið 2015 var hann dæmdur í þriggja ára fangelsi fyrir að brjóta kynferðislega á níu drengjum á aldrinum 15-17 ára með tælingum og kaupum á vændi. Sjálfur var hann 23 ára gamall þegar dómur féll og gekkst hann við brotunum og samþykkti að greiða þolendum sínum miskabætur.
„Auk þess sem mögulegt er að fleiri Íslendingar en ég dragist í net þessarar rannsóknar sem ber meiri blæ af pólitískum ofsóknum en sakarannsókn“
„Þar sem staðfest er að ég hef um árabil verið viðfang þessarar sakarannsóknar, svo og tveir af mínum fyrrverandi og núverandi samstarfsfélögum (Sarah Harrisson og Joseph Farrell), auk þess sem mögulegt er að fleiri Íslendingar en ég dragist í net þessarar rannsóknar sem ber meiri blæ af pólitískum ofsóknum en sakarannsókn, og fyrir það að ég ritstýri WikiLeaks um þessar mundir, tel ég yður skylt að veita mér upplýsingar um þetta tilvik,“ segir meðal annars í bréfi Kristins.
Hafði forsætisráðherra vitneskju um aðstoð yfirvalda?
Beinir hann eftirfarandi spurningum til stjórnvalda:
Til utanríkisráðherra: Hafðir þú eða ráðuneyti þitt vitneskju og/eða milligöngu um að þessir embættismenn kæmu til landsins í fyrrgreindum erindagjörðum?
Til dómsmálaráðherra: Hafðir þú, ráðuneytið þitt og/eða undirstofnanir vitneskju og/eða milligöngu um þessa aðstoð við hina erlendu sakarannsókn?
Til Ríkislögreglustjóra: Á hvaða grunni veitti embætti yðar þessa aðstoð sem meðal annars beinist gegn hagsmunum íslenskra ríkisborgarar?
Til Ríkissaksóknara: Á hvaða lagagrunni byggir embætti yðar þegar veitt er aðstoð af þessu tagi?
Til forsætisráðherra: Var yður sem forsætisráðherra ljóst að ríkisstjórn í nafni yðar og embættismenn sem starfa undir hennar stjórn, væru með þessum hætti að veita aðstoð sína við pólitíska aðgerð sem nú þegar er fordæmd víða um heim sem ein versta aðför að frelsi fjölmiðla á síðari tímum?
Hætta á 175 ára fangelsisdómi
Að lokum óskar hann svara fyrir 14. Júní, þegar frestur bandarískra yfirvalda rennur út til að skila inn skjölum og bæta við ákærum á hendur Julian Assange, útgefanda WikiLeaks, til að styðja við framsalskröfu í Bretlandi. Nú þegar séu ákæruliðir orðnir 18, þar af 17 sem byggðir eru á njósnalöggjöf frá 1917 sem er nú í fyrsta sinn beitt gegn blaðamönnum. Samtals fela þessir átján ákæruliðir samanlagða hámarksrefsingu upp á 175 ára fangelsi.
Athugasemdir