Stjórn Strætó bs. samþykkti á fundi sínum 1. febrúar að óska eftir varanlegri heimild til þess að leyfa gæludýr í strætisvögnum. Heimild fyrir tilraunaverkefni þess eðlis sem veitt var í fyrra rennur út í lok mars.

Strætó hefur látið framkvæma þrjár kannanir á viðhorfi vagnstjóra og farþega til gæludýra í strætó. Sýna niðurstöðurnar að 50% þeirra eru jákvæðir eða mjög jákvæðir fyrir verkefninu. Tíu kvartanir eða ábendingar höfðu borist frá því að verkefnið fór af stað þar til í lok janúar.

Framkvæmdastjóri Strætó mun nú óska eftir varanlegri heimild við umhverfis- og auðlindaráðuneytið. Samráðshópur haghafa mun einnig meta kosti og galla við verkefnið, í samræmi við þau skilyrði sem ráðuneytið setti verkefninu.