Fjölga má íbúðum um allt að 1.730 í Ártúnsholti, Árbæ og Selási, samkvæmt tillögu að nýju hverfisskipulagi sem borgaryfirvöld hafa auglýst. Veittar verða heimildir fyrir aukaíbúðum í sérbýli og byggð þannig þétt verulega.

Þetta kemur fram í Morgunblaðinu í dag. Sigurborg Ósk Haraldsdóttir, formaður skipulags- og samgönguráðs Reykjavíkur, segir að þessar breytingar verði gerðar í öllum hverfum borgarinnar. „Við erum líka að gefa íbúunum færi á að hafa leiguíbúðir innan síns húsnæðis sem geta þá verið tekjuaukandi og aukið verðmæti eignarinnar,“ segir hún. „Það er til dæmis íbúðarhúsnæði í mörgum bílskúrum í dag, þótt slíkt sé ekki löglegt. Þetta snýst því líka um að stíga skrefið í átt að raunveruleikanum.“

Aukaíbúðir eru um 50 fermetrar og eru gerðar með því að skipta eldra rými eða breyta bílskúrum. Óheimilt er að selja þær frá aðalíbúð enda megi sameina þær aftur ef eigendur óska þess. Með breytingunum gefst eigendum tækifæri til að leigja rými út og afla tekna eða leyfa fjölskyldumeðlimum að búa í séríbúð.

Til stendur að skoða sambærilega þéttingu í öllum hverfum borgarinnar með sömu heimild. Nýtingarhlutfallið er þó mismunandi eftir hverfum. Bæta megi hæðum ofan á fjölbýlishús eða þétta byggð í kringum þau.

Í frétt Morgunblaðsins kemur einnig fram að Bjarg íbúðafélag hyggist byggja allt að 220 íbúðir við Hraunbæ og að 60 íbúðir fyrir aldraða rísi á sama svæði.