Níðstöngin sem reist var Óttari Yngvasyni á Bíldudal í dag er ekki níðstöng heldur einna líkust vindgapa. Samkvæmt fornri trú telst aðeins um níðstöng að ræða sé hún prýdd hrosshaus eða líkani af hrosshaus. Sé hins vegar lönguhaus á stönginni er hún ekki níðstöng heldur svokallaður vindgapi sem notaður er til að særa fram storma og sökkva skipum. Stundin hefur ekki fengið staðfestingu á því hvort um löngu eða aðra fisktegund var að ræða á Bíldudal.

Í september 1990 efndi Bandalag háskólamenntaðra ríkisstarfsmanna (BHMR) til mótmælaaðgerða við stjórnarráðið til að mótmæla því að bráðabirgðalög hefðu verið sett á verkfall þeirra. Á flötinni fyrir framan stjórnarráðið var ríkisstjórn Steingríms Hermannssonar reist það sem talið var að væri níðstöng. Þá stöng prýddi hins vegar þorskhaus og var því um ekki um eiginlegan vindgapa að ræða. Því hafðist lögregla ekki að, ólíkt því sem gerst hafði skömmu áður þegar Samtök herstöðvaandstæðinga reistu fastaflota NATO níðstöng, með hrosshaus. Þá níðstöng gerði lögreglan upptæka ólíkt stöng BHMR.

Þrátt fyrir að níðstöng þeirra BHMR-manna hafi ekki verið eiginleg níðstöng dró aðgerðin dilk á eftir sér. Þannig sendi Prestafélag Íslands, sem var aðili að BHMR, ályktun frá sér þar sem sá hluti aðgerðanna, að reisa umrædda stöng, var harmaður. Þótti aðgerðin ógeðfelld og vildi stjórna Prestafélagsins firra sig allri ábyrgð á athæfinu.