Velferðarráðuneytið hefur sent frá sér tilkynningu vegna samskipta ráðneytisins og Barnaverndarstofu að því er varðar athugasemdir sem barnaverndarnefndir Reykjavíkur og Hafnarfjarðar hafa gert við háttsemi og framgöngu Braga Guðbrandssonar, forstjóra Barnaverndarstofu. Ráðuneytið segir ekki Barnaverndarstofu ekki fara með rétt mál varðandi afhendingu gagna í málinu, en Barnaverndarstofa sendir frá sér yfirlýsingu vegna málsins á föstudag. Í henni segir meðal annars að erfiðlega hafi gengið að fá gögn málsins, ekki síst þau sem varði „meintar“ kvartanir frá barnaverndarnefndum í garð Braga. 

Í tilkynningu ráðuneytisins segir meðal annars að ljóst liggi fyrir að kvartanirnar hafi verið gerðar og er vísað til bréfs sem ráðuneytið sendi Braga í nóvember síðastliðnum. Í bréfinu eru raktar efnislega þær athugasemdir og umkvartanir sem formenn barnaverndarnefnda Reykjavíkur og Hafnarfjarðar komu á framfæri á fundi með félags- og jafnréttismálaráðherra. „Að mati ráðuneytisins voru þær athugasemdir efnislega skýrar og vel afmarkaðar og vandséð að Barnaverndarstofa þarfnaðist frekari gagna til að gera ráðuneytinu grein fyrir afstöðu sinni til þeirra,“ segir í tilkynningu ráðuneytisins. 

Barnaverndarstofu hefur nú í tvígang verið veittur frestur til að bregðast við bréfi ráðuneytisins og hefur nú frest til hádegis 14. desember næstkomandi. 

Eins og Stundin rakti ítarlega í síðasta tölublaði snúa kvartanirnar að miklu leyti að samskiptaháttum Braga. Hann er sagður grípa inn í mál, kippa einstökum börnum fram fyrir röðina í meðferðarúrræðum án samráðs við barnavernd, úrskurða um viðkvæm málefni án fullnægjandi upplýsinga og fara harkalega gegn barnaverndarnefnd og starfsmönnum hennar. „Ég er alveg rólegur yfir þessu,“ sagði Bragi í samtali við Stundina. „Ég held að gögnin eigi eftir að leiða í ljós að þetta hafi verið stormur í vatnsglasi.“ 

Tilkynning velferðarráðuneytisins í heild:

Velferðarráðuneytið telur mikilvægt að koma á framfæri eftirfarandi staðreyndum um samskipti þess og Barnaverndarstofu vegna alvarlegra athugasemda sem barnaverndarnefndir Reykjavíkur og Hafnarfjarðar hafa gert við háttsemi og framgöngu forstjóra stofnunarinnar og starfsfólks hennar.  Er þetta gert í ljósi yfirlýsingar sem birt var á vef Barnaverndarstofu síðastliðinn föstudag.

Skyldur ráðuneytis sem fer með yfirstjórn barnaverndar í landinu

Velferðarráðuneytið er æðsta stjórnvald barnaverndar og ber því ríkar skyldur. Þegar tvær af stærstu barnaverndarnefndum landsins leita til ráðuneytisins með alvarlegar athugasemdir sem beinast að Barnaverndarstofu og forstjóra hennar ber ráðuneytinu að taka það alvarlega og bregðast við eins og vönduð stjórnsýsla býður. Barnavernd er afar viðkvæmur málaflokkur og algjörlega nauðsynlegt að tryggja eins og kostur er að einstaklingar og stofnanir sem gegna þar hlutverki geti unnið saman á grundvelli trausts og þess trúnaðar sem áskilinn er. Gangi það ekki eftir eru mikilvægir hagsmunir barna í húfi.

Málavextir

Í yfirlýsingu Barnaverndarstofu er því haldið fram að erfiðlega hafi gengið að fá gögn málsins, ekki síst þau sem varði „meintar“ kvartanir frá barnaverndarnefndum í garð forstjóra Barnaverndarstofu. Þetta er ekki rétt. Það liggur ljóst fyrir að kvartanir hafa verið gerðar, samanber minnisblað formanns barnaverndar Reykjavíkur sem getið er um í yfirlýsingu Barnaverndarstofu og fleiri gögn sem ráðuneytið hefur látið Barnaverndarstofu í té, þar með taldar upplýsingar frá barnaverndarnefnd Hafnarfjarðar.

Í bréfi ráðuneytisins til forstjóra Barnaverndarstofu, dags. 21. nóvember síðastliðinn, eru raktar efnislega þær athugasemdir og umkvartanir sem formenn barnaverndarnefnda Reykjavíkur og Hafnarfjarðar höfðu komið á framfæri í kjölfar fundar þeirra og formanns barnaverndarnefndar Kópavogs sem þeir áttu með félags- og jafnréttismálaráðherra 10. nóvember. Að mati ráðuneytisins voru þær athugasemdir efnislega skýrar og vel afmarkaðar og vandséð að Barnaverndarstofa þarfnaðist frekari gagna til að gera ráðuneytinu grein fyrir afstöðu sinni til þeirra.

Þegar Barnaverndarstofa óskaði eftir lengri fresti til að bregðast við bréfi ráðuneytisins var orðið við því í ljósi þess að stofan taldi sig þurfa lengri tíma til að skoða viðbótargögnin frá ráðuneytinu. Síðastliðinn föstudag var Barnaverndarstofu enn á ný veittur frestur vegna greinargerðar til ráðuneytisins sem stofan er að vinna og var þá litið til þess að um nýja málsástæðu væri að ræða þar sem Barnaverndarstofa hafði kynnt fyrir ráðuneytinu að stofunni væri nauðsynlegt að skoða gögn sem hún sjálf býr yfir allt aftur til ársins 2002.

Barnaverndarstofa hefur frest til að skila greinargerð gerð sinni til ráðuneytisins til hádegis 14. desember næstkomandi. Ráðuneytið hefur farið þess á leit við Barnaverndarstofu að þetta mál verði sett í forgang vegna þess hve brýnt það er.

Í yfirlýsingu Barnaverndarstofu kemur fram að stofan hafi óskað eftir að lagt verði mat á hvort skrifstofustjórinn sem fer með málefni barnaverndar í ráðuneytinu kunni að vera vanhæfur vegna fyrri starfa sinna hjá Reykjavíkurborg. Slíkt mat verður gert og ætti að liggja fyrir á næstu dögum.