Risa­vaxið aug­lýs­inga­skilti fyrir H&M sem komið var fyrir á Lækj­ar­torgi í gær hefur vakið athygli og umtal. 

Samkvæmt reglum Reykja­vík­ur­borgar ber að sækja um leyfi til afnota af borg­ar­landi, en til þess telj­ast allar götur, gang­stéttar, stígar, opin svæði, almenn­ings­garðar og torg. Þegar Stundin spurð­ist fyrir um skiltið í gær komu starfs­menn borg­ar­innar af fjöllum og könn­uð­ust ekki við að veitt hefði verið leyfi fyrir aug­lýs­ing­unni sem blasir við í gang­veg­inum á Lækj­ar­torgi í formi stórs inn­kaupa­poka með enskri áletrun: “Grand Opening: See you at Smára­lind! August 26”.

Síðar um dag­inn fékk Stundin þau svör að skiltið hefði verið sett upp í leyf­is­leysi og að það yrði fjar­lægt við fyrsta tæki­færi.

Nokkru eftir að Stundin greindi frá því tók Vísir.is við­tal við Guðmund Vigni Ósk­ars­son, verk­efna­stjóra leyf­is­veit­inga borg­ar­lands, sem full­yrti hins vegar að H&M hefði sótt um til­skilin leyfi fyrir aug­lýs­ing­unni og að hún fengi að standa fram yfir mán­aða­mót. Þetta stang­ast á við upp­lýs­ingar sem Stundin fékk frá æðstu stjórn­sýslu Reykja­vík­ur­borgar. Beðist er vel­virð­ingar á mis­tök­unum. 

Fréttin var upp­færð eftir birt­ingu.