Inni í miðri borg stendur úrræði á vegum barnaverndar fyrir börn og ungmenni sem hafa villst þannig af leið að það þarf að frelsissvipta þau. Á sínum tíma voru Stuðlar reistir í útjaðri borgarinnar, en nú hefur borgin vaxið utan um meðferðarheimilið, skemmtanahöll risið í næsta húsi og vegfarendur sem eiga leið hjá hafa ósjaldan haldið símunum á lofti þegar lögregla fylgir skjólstæðingum inn. Aðkoman ber þess hins vegar merki að hingað á enginn að koma án þess að eiga erindi. 

Alls eru 35 þúsund krakkar á aldrinum 12 til 18 ára hér á landi, þar af tæp tólf þúsund í Reykjavík. Aðeins örlítið brot af þessum hópi á nokkurn tímann erindi á Stuðla. Árlega dvelja þar á milli 70 til 80 börn, þótt fjöldi daga og vistana sé misjafn. Þótt hópurinn sé lítill í þessu almenna samhengi, er álagið á starfsemina engu að síður mikið. Hingað koma börn úr …