Benjamin Netanyahu, forsætisráðherra Ísraels, mætti aftur fyrir dóm í Tel Aviv í dag í skýrslutöku í langvinnum réttarhöldum yfir honum vegna meintrar spillingar, sem staðið hafa yfir frá því í maí 2020.

Forsætisráðherrann brosti þegar mótmælendur gerðu hróp að honum og fylgdarliði hans, sem samanstóð af nokkrum ráðherrum úr íhaldssama Likud-flokknum, á leið þeirra til dómstólsins.

Þetta gerist eftir að Donald Trump, forseti Bandaríkjanna, stakk upp á því á mánudag í ræðu fyrir ísraelska þinginu, Knesset, að forsætisráðherra Ísraels yrði náðaður í þremur aðskildum spillingarmálum sínum.

Dómþingið í Tel Aviv kemur í kjölfar þess að gíslar sem Hamas tók voru látnir lausir sem hluti af áætlun Trumps, sem Bandaríkin miðluðu, um að binda enda á stríð Ísraels og Hamas á Gaza.

Í einu málinu eru Netanjahú og eiginkona hans, Sara, sökuð um að hafa þegið lúxusvörur að verðmæti meira en 260.000 dollara, þar á meðal kampavín, vindla og skartgripi, frá milljarðamæringum í skiptum fyrir pólitíska greiða.

Í tveimur öðrum tilvikum er Netanjahú einnig ákærður fyrir að hafa reynt að semja um betri fjölmiðlaumfjöllun frá tveimur ísraelskum fjölmiðlum. Hann hefur neitað allri sök og heldur því fram að hann sé fórnarlamb pólitísks samsæris.

Á núverandi kjörtímabili sínu, sem hófst seint á árinu 2022, hefur Netanyahu lagt til víðtækar breytingar á dómskerfinu sem gagnrýnendur segja að hafi miðað að því að veikja dómstólana.

Þær breytingar leiddu til gríðarlegra mótmæla sem lægðu ekki fyrr en stríðið á Gaza hófst, sem var hrundið af stað með árás Hamas á Ísrael þann 7. október 2023.

Í ávarpi til ísraelska þingsins, Knesset, á mánudag sagði Trump við þingheim að Netanyahu ætti að fá náðun í spillingarmálunum.

„Vindlar og kampavín, hverjum er ekki sama um það?“ grínaðist Trump, áður en hann spurði ísraelskan starfsbróður sinn, Isaac Herzog: „Af hverju náðarðu hann ekki?“

Einnig hefur lþjóðlegi sakamáladómstóllinn (ICC) gefið út handtökuskipun á Netanjahú vegna gruns um að hafa staðið fyrir stríðsglæpum í árásum ísraelshers á Gaza, sem sagðar voru beinast að Hamas-samtökunum en hafa lagt stóran hluta byggðarinnar í rúst og banað 68 þúsund manns, þar af er áætlað að 80% séu almennir borgarar og 18.500 börn.

Netanjahú á metið yfir flest ár í embætti forsætisráðherra Ísraels, en hann hefur setið í 18 ár í nokkrum lotum sem forsætisráðherra frá árinu 1996.