Langmestur úrgangur á Íslandi eða 88 prósent er endurnýttur. Þetta kemur fram í nýjum magntölum fyrir úrgang á Íslandi sem Umhverfis- og orkustofnun gaf út nýverið. Hátt hlutfall endurnýtingar má helst rekja til jarðvegsúrgangs sem er þyngsti og stærsti hluti úrgangs. Mikilvægt er að einblína á heimilisúrganginn en Ísland þarf að halda vel á spöðunum til að uppfylla lágmarkskröfur um endurvinnslu hans. Nú náum við einungis 32 prósentum af fimmtíu.
„Langalgengasta meðhöndlun jarðvegs er að nýta hann í fyllingar sem eru tegund af endurnýtingu. Það útskýrir þetta rosalega háa hlutfall endurnýtingar,“ segir Rakel Sigurveig Kristjánsdóttir, sérfræðingur hjá Umhverfis- og orkustofnun. Hún bætir við: „Það sem við erum meira að horfa á þegar við erum að skoða hversu vel við stöndum okkur er heimilisúrgangur – sem er þá úrgangur frá heimilum og fyrirtækjum. Það er úrgangur sem við höfum mikla stjórn á og fylgir neyslu.“
Athugasemdir