Utanríkisráðuneytið hefur hvorki upplýsingar um fjölda íslenskra ríkisborgara sem hafa sótt herþjálfun erlendis síðustu 15 ár, né þá Íslendinga sem hafa sinnt herþjónustu á virkum átakasvæðum.
Þetta kemur fram í skriflegu svari Þorgerðar Katrínar Gunnarsdóttur utanríkisráðherra við fyrirspurn Bryndísar Haraldsdóttur, þingmanns Sjálfstæðisflokksins, á Alþingi. Bryndís óskaði eftir upplýsingum um árlegan fjölda þeirra íslensku ríkisborgara sem sótt hafa herþjálfun frá 2010 til 2025 og í hvaða ríki hún hafi farið fram.
„Utanríkisráðuneytið hefur ekki upplýsingar um fjölda íslenskra ríkisborgara sem hafa sótt herþjálfun erlendis, ráðuneytið býr einungis yfir upplýsingum um fjölda íslenskra ríkisborgara sem hafa sótt um skólavist í norskum herskóla,“ segir í svari ráðherra. „Íslenskir ríkisborgarar hafa samkvæmt samningi frá 1995 rétt til að sækja um skólavist við herskóla í Noregi. Ferlið er á þann veg að umsækjendur senda öll umsóknargögn á utanríkisráðuneytið, ráðuneytinu er gefinn kostur til að gera athugasemdir um umsóknina og áframsendir svo umsóknina til norska sendiráðsins á Íslandi. Öll samskipti sem fara fram eftir það eru á milli norska herskólans og umsækjanda beint og er ráðuneytið ekki upplýst um það hvort umsækjandi fái skólavist.“
Þá spurði Bryndís hversu margir íslenskir ríkisborgarar hafi sinnt herþjónustu á virkum átakasvæðum á árunum 2010 til 2025. „Utanríkisráðuneytið hefur ekki upplýsingar um íslenska ríkisborgara sem sinna eða hafa sinnt herþjónustu á virkum átakasvæðum,“ segir í svarinu.
Athugasemdir (1)