Samfélagsmiðlar hafa logað síðustu daga vegna skrifa um að níu hælisleitendur hafi hópnauðgað 16 ára stúlku. Lögreglan á höfuðborgarsvæðinu segir ekkert mál af þessum toga vera á sínu borði.
Vefmiðillinn Frettin.is birti á laugardag grein þar sem segir að miðlinum hafi „borist upplýsingar um alvarlega hópnauðgun sem kom upp um páskana, þar sem erlendir menn eru grunaðir um að hafa brotið kynferðislega á 16 ára stúlkubarni.“
Þá er fullyrt að um níu menn hafi verið að ræða og samkvæmt heimildarmanni Frettin.is séu „gerendurnir hælisleitendur frá Palestínu og Tyrkir.“ Þetta segist Frettin.is hafa eftir einstaklingi sem tengist stúlkunni fjölskylduböndum.
Sömuleiðis eru lýsingar á meintu broti þar sem segir að stúlkan hafi verið á göngu þegar „erlendir menn nálguðust hana á fólksbíl, hrifsuðu upp í bílinn og frelsissviptu. Upptökur af frelsissviptingunni liggja fyrir hjá lögreglu samkvæmt sömu heimildum. Ekið var með stúlkuna á ótilgreindan stað þar sem mennirnir brutu á barninu kynferðislega og skiptust á að nauðga stúlkunni í um þrjár klukkustundir. Eftir að hafa níðst á stúlkunni klukkutímum saman, var ekið með hana í íbúð í Vesturbænum, þar sem fleiri menn héldu sig til og brutu þeir allir á henni í sjö klukkustundir til viðbótar.“
Greinin hefur vakið gríðarlega athygli og mikill fjöldi fólks deilt henni á samfélagsmiðlum. Stór orð eru gjarnan látin falla varðandi málið. Einn segir: „HVERS VEGNA ERU ÞESSIR MÚSLIMAR EKKI I HALDI LÖGREGLU“, annar: „Það eru langir vegir frá því að hægt sé að kalla þetta menn, þetta er verra heldur en óðir hundar, og óða hunda á að aflífa,“ og þriðji „Út með þetta pakk. Endilega deila þessu og stöndum saman, áður enn þetta verður eins og í Bretlandi. P.S. Og engar helvítis Moskvur , ef fólk vill setjast að á Íslandi, þá á það að taka up okkar hefðir og trú.“.
Athugasemdir