Jón Gunnarsson, fyrrverandi ráðherra, verður þingmaður Sjálfstæðisflokksins á komandi kjörtímabili, eftir að Bjarni Benediktsson formaður flokksins afsalar sér þingsæti sínu.
Bjarni boðaði í yfirlýsingu fyrr í dag að hann ætlaði ekki að taka þingsæti á nýju þingi sem ráðgert er að komi saman síðar í mánuðinum.
Jón er fyrsti varamaður flokksins í kjördæmi Bjarna, en hann var í 5. sæti á framboðslista flokksins í Suðvesturkjördæmi í síðustu kosningum, á eftir Bjarna sjálfum, Þórdísi Kolbrúnu R. Gylfadóttur, Bryndísi Haraldsdóttur og Rósu Guðbjartsdóttur.
Sjálfstæðisflokkurinn fékk 23,4 prósent atkvæða og þrjá kjördæmakjörna þingmenn í kjördæminu í nýliðnum kosningum og einn jöfnunarþingmann að auki. Því er ljóst að Jón, sem hefur setið á þingi fyrir Sjálfstæðisflokkinn í Suðvesturkjördæmi óslitið frá 2007, kemur inn á þing við brotthvarf Bjarna.
Leyniupptaka lýsti pólitískum hrossakaupum
Kosningabaráttan á haustmánuðum litaðist nokkuð af umræðu um þá Bjarna og Jón og samband þeirra. Heimildin sagði frá því 11. nóvember að sonur Jóns og viðskiptafélagi hefði sagt manni sem þóttist vera fjárfestir að Jón hefði samþykkt beiðni Bjarna um að þiggja sæti á lista flokksins gegn því að Jón kæmist í aðstöðu til að veita Hval hf. veiðileyfi.
Þannig yrði það arfleifð Jóns í pólitík að veita Kristjáni Loftssyni vini sínum hvalveiðileyfi, en eins og frægt hefur orðið veitti Bjarni, sem starfandi matvælaráðherra, veiðileyfið áður en hann lét af embættinu.
Þegar leyniupptakan af syni Jóns og fréttir um hana voru birtar voru nokkrir dagar liðnir frá því að Jón var gerður að sérstökum erindreka Bjarna í matvælaráðuneytinu.
Það gerðist raunar sama dag og Jón þáði fimmta sætið á lista Sjálfstæðisflokksins í Suðvesturkjördæmi, eftir að hafa áður tapað fyrir Þórdísi Kolbrúnu varaformanni flokksins í baráttu um annað sætið á framboðslistanum.
Er það í þessu tilfelli að vinna í hrappdrætti?