Vilja flytja 29 þúsund manns upp á Eyrarfjall árlega

Kláfur sá sem félagið Eyr­ar­kláfur ehf. áformar að reisa á Eyr­ar­fjalli ofan Ísa­fjarðar getur ferjað 45 manns í hverri ferð og í kringum 500 manns á klukku­stund. Kláfinn telja aðstand­endur verk­efn­is­ins upp­lagða afþr­ey­ingu fyrir ferða­menn sem koma í tug­þús­unda­vís með lysti­skipum til Ísa­fjarðar ár hvert. Áætlanir gera ráð fyrir að árlega verði 29 þús­und manns flutt upp á fjallið til þess að njóta útsýnis.  

Þetta er meðal þess sem fram kemur í mats­á­ætlun um verk­efnið sem nú hefur verið aug­lýst í Skipu­lags­gátt. For­svars­maður Eyr­ar­kláfs ehf. sagði í við­tali við fjöl­mið­il­inn FF7 fyrir ári að áætl­aður heild­ar­kostn­aður verk­efn­is­ins væri 3,5 millj­arðar króna og að far með kláfnum kosti 7.500 fyrir full­orð­inn ein­stak­ling.

Skipu­lags­stofnun komst að þeirri nið­ur­stöðu að fram­kvæmdin þyrfti í umhverf­is­mat. Því mót­mælti Eyr­ar­kláfur ehf. og kærði til úrskurð­ar­nefndar auð­linda­mála. Nefndin hafn­aði hins vegar kröfu félags­ins. 

Veitingastaður á toppnum

Fram­kvæmdin felur í sér að byggja byrj­un­ar­stöð kláfs­ins við hlíð­ar­fót Eyr­ar­fjalls og enda­stöð í 700 metra hæð á toppi Eyr­ar­fjalls. Um miðja vegu yrði reistur milli­staur. Við enda­stöð­ina yrði byggður bið­salur og einnig er fyr­ir­hugað að reisa þar mót­töku­sal og veit­inga­stað. Að auki stendur til að gera göngu­stíga úr möl og pöllum með­fram fjalls­brún Eyr­ar­fjalls. Hið fyr­ir­hug­aða fram­kvæmda­svæði er allt í eigu Ísa­fjarð­ar­bæjar, segir í mats­á­ætl­un­inni. Hafa bæj­ar­yf­ir­völd und­ir­ritað vilja­yf­ir­lýs­ingu vegna fram­kvæmd­anna. 

Síðasta sumar komu 195 skemmti­ferða­skip til Ísa­fjarð­ar­bæjar með um 180 þús­und far­þega um borð. „Vöntun er á afþr­ey­ingu og úti­vist fyrir allan þann mann­fjölda sem kemur í land á Ísafirði og myndi kláf­ur­inn vera góð við­bót við annað á svæð­inu,“ segir í mats­á­ætl­un­inni. Gert er ráð fyrir að rekst­ur­inn á kláfnum sé aðal­lega yfir sum­ar­tím­ann en þó hægt að hafa opið um helgar yfir vetr­ar­tím­ann ef veður leyfir. 

Ekki hafa verið gerðar veð­ur­fars­legar rann­sóknir á Eyr­ar­fjalli sjálfu en fram­kvæmda­að­ilar hafa m.a. stuðst við veð­ur­gögn frá Þver­fjalli og flug­vell­inum á Ísafirði. Einnig verða not­aðar upp­lýs­ingar frá þremur veð­ur­stöðvum sem Fossa­vatns­gangan rekur á Heiðinni, Nónvatni og Mið­fells­hálsi.

Í mats­á­ætl­un­inni kemur fram að hægt sé að reka kláf­inn í allt að 22 m/sek vindi. „Ljóst er að þótt kláf­ur­inn verði ekki í notkun að vetr­ar­lagi þurfa vírar, staurar og bygg­ingar að þola það veð­ur­far sem er á svæð­inu að vetri til,“ segir í áætl­un­inni. Hvass­viðri, ofan­koma og ísing séu nátt­úru­vár­þættir sem gæta verði að.