Bjarni Bene­dikts­son, starf­andi mat­væla­ráð­herra, hefur gefið út leyfi til veiða á hövlum. Þetta kemur fram í til­kynn­ingu frá mat­væla­ráðu­neyt­inu.

Leyfin eru tvö; annað til veiða á lang­reyðum og hitt til veiða á hrefnum. Það er Hvalur hf., félag undir stjórn Krist­jáns Lofts­sonar, sem fær leyfi til að veiði lang­reyðar og Tjald­tangi ehf, sem gerir út Halldór Sig­urðs­son ÍS, fær leyfið til að veiða hrefnur.

Tvær aðrar umsóknir bár­ust til hrefnu­veiða en svo virð­ist sem þeim hafi verið hafnað. 

Hval­veiðar hafa lengi vel verið afar umdeildar og komst umræða um þær í hámæli nýverið þegar leyni­upp­tökur af syni og við­skipta­fé­laga Jóns Gunn­ars­sonar, fyrr­ver­andi þing­manns, komu fram í dags­ljósið. Heim­ildin fjall­aði ítar­lega um málið þann 11. nóv­em­ber síð­ast­lið­inn.

Þar full­yrti hann að Jón hafi sam­þykkt beiðni Bjarna Bene­dikts­son­ar um að þiggja sæti á lista Sjálf­stæð­is­flokks­ins gegn því að Jón kom­ist í að­stöðu til veita veiði­leyfi til Hvals hf. Það yrði arf­leifð Jóns að tryggja Krist­jáni Lofts­syni nán­um vini sín­um leyf­ið. 

Það leyfi hefur nú verið veitt.

Svandís Svav­ars­dóttir, þáver­andi mat­væla­ráð­herra, bann­aði hval­veiðar tíma­bundið í fyrra­sumar. Síðar varð það nið­ur­staða umboðs­manns Alþingis að ákvörðun hennar stæð­ist ekki lög.

Bjarkey Olsen Gunn­ars­dóttir, fyrr­ver­andi þing­kona Vinstri grænna, sat í mat­væla­ráðu­neyt­inu þegar rík­is­stjórnin sprakk og boðað var til kosn­inga. Hún neit­aði, líkt og aðrir ráð­herrar flokks­ins, að sitja áfram í starfs­stjórn þar til ný rík­is­stjórn hefur verið mynduð. Í stað þess að skipa nýja ráð­herra í starfs­stjórn­ina var verk­efnum dreift á milli ann­arra ráð­herra. Það kom í hlut Bjarna að taka að sér ráð­herra­emb­ætti í mat­væla­ráðu­neyt­inu.

Þrátt fyrir að búið sé að kjósa nýtt þing er ekki enn búið að mynda rík­is­stjórn. Starfs­stjórnin, með Bjarna inn­an­borðs, er því enn við völd. 

Bjarni Bene­dikts­soner bæði for­sæt­is­ráð­herra og mat­væla­ráð­herra. Á undan honum sat Bjarkey Olsen Gunn­ars­dóttir í ráðu­neyt­inu en hún hætti þar þegar Vinstri græn neit­uðu að taka þátt í starfs­stjórn eftir að Bjarni sleit rík­is­stjórn­inni.

Mynd: Golli

Flokkar í stjórnarmyndun studdu hvalveiðibann 

Mikið hefur verið tek­ist á um málið á Alþingi en Andrés Ingi Jónsson, frá­far­andi þing­maður Pírata, lagði fram frum­varp um bann við hval­veiðum síð­asta haust. Þingmenn úr Flokki fólks­ins, Sam­fylk­ingu og Viðreisn lögðu frum­varpið fram með Andrési Inga. Þessir þrír flokkar eiga nú í við­ræðum um nýja rík­is­stjórn.

Með því að leyfa hval­veiðar til fimm ára, eins og gert var árin 2009, 2014 og 2019, segir mat­væla­ráðu­neytið að nokkur fyr­ir­sjá­an­leiki í atvinnu­grein­inni sé tryggður. 

„Leyfin fram­lengj­ast árlega um eitt ár og heim­ilt er að flytja allt að 20% af veiði­heim­ildum hvers árs yfir á næsta ár. Fiski­stofa og Mat­væla­stofnun munu sem fyrr hafa eft­ir­lit með veið­unum.“

Í til­kynn­ingu mat­væla­ráðu­neyt­is­ins kemur fram að ráð­gjöf Haf­rann­sókn­ar­stofn­unar hafi verið á þá leið að árlegar veiðar hrefnu til árs­ins 2025 nemi ekki meira en 217 dýrum.

„Árið 2018 voru sex hrefnur veiddar við Ísland og árið 2021 var ein hrefna veidd. Engar lang­reyðar hafa verið veiddar á árinu 2024, árið 2022 voru 148 dýr veidd eftir þriggja ára veiði­hlé og 24 dýr voru veidd árið 2023.“

Fréttin hefur verið upp­færð