Áformað er að breyta skipulagi svæðis sunnan Borgarspítalans svo þar megi rísa „fjölbreytt og lágreist 2–5 hæða íbúðabyggð“ sem yrði „spennandi fyrir unga sem aldna“. Í deiliskipulagslýsingu sem borgaryfirvöld hafa auglýst kemur fram að reiknað sé með 250–400 íbúðum á svæðinu. Tún og trjágróður einkenna svæðið í dag en drottning þess, bygging Borgarspítalans, er eitt helsta kennileiti Reykjavíkur. Í umsögnum um skipulagstillöguna vekja margir máls á því og vilja að byggingin fái að njóta sín áfram og stinga upp á að svæðið verði allt skipulagt i tengslum við framtíðarnýtingu hennar.
Skipulagssvæðið sem auglýst er afmarkast af Háaleitisbraut til vesturs, suðurjaðri Borgarspítalans til norðurs, núverandi íbúðabyggð við Markarveg og Kjarrveg til suðurs og Álftalandi til austurs. Landið hallar frá norðaustri til suðvesturs og er mesti hæðarmunur um 12 metrar. Íbúðabyggð sunnan og austan við reitinn einkennist af lágreistum einbýlishúsum og rað- og parhúsum.
Lóðin sem skipulagslýsingin nær til er 4,7 hektarar að stærð og er gert ráð fyrir að stærstur hluti hennar fari undir nýja íbúðabyggð sem yrði að hámarki fimm hæðir.
Sveigð og hringlaga form
Henny Hafsteinsdóttir, minjavörður Reykjavíkur og nágrennis, rifjar í umsögn sinni upp sögu Borgarspítalans sem hún segir mikilvægt kennileiti í borgarlandinu. Spítalinn var reistur á árunum 1950–1973 eftir teikningum arkitektanna Einars Sveinssonar og Gunnars H. Ólafssonar. Er hann jafnframt eitt stærsta verk Einars.
Einar hafði mikil áhrif á skipulags- og byggingarmál Reykjavíkur á árunum 1934–1973. Hann lagði áherslu á hagræði og góð dagsbirtuskilyrði við hönnun á innra skipulagi bygginga, segir Henny. Snemma hafi mátt greina ákveðin höfundareinkenni í húsum Einars, t.a.m. skásett, sveigð og hringlaga form sem áttu rætur að rekja til áhuga hans á stærðfræði. Þessi höfundareinkenni má að sögn Hennyar greina í ásýnd Borgarspítala, t.a.m. aðalinngangi, hringlaga gluggum og skásettum útskotum.
„Þrátt fyrir að Borgarspítali sé staðsettur utan við mörk skipulagssvæðisins sem hér er til umsagnar, telur Minjastofnun mikilvægt að tekið sé tillit til hans við hönnun skipulagsins. Setja mætti fram í skipulagsuppdrætti skýringar á því hvernig ný byggð muni styrkja ásýnd svæðisins og áframhaldandi stöðu Borgarspítala sem skýrt kennileiti í borgarlandinu.“
Íbúaráði Háaleitis- og Bústaðahverfis er einnig umhugað um Borgarspítalann nú þegar eigi að fara að þétta byggðina umhverfis hann. Að mati íbúaráðsins er mikilvægt að sú byggð sem rísa mun á svæðinu taki mið af nærliggjandi íbúabyggð um leið og gert verði ráð fyrir góðum útivistarmöguleikum „og að Borgarspítalanum verði áfram tryggt gott andrými á reitnum“.
„Með flutningi á núverandi starfsemi Borgarspítalans niður á Hringbraut er ljóst að finna þarf nýja notkun fyrir húsnæði spítalans“
Við mótun svæðisins ætti einnig að mati íbúaráðsins að taka mið af núverand starfsemi á svæðinu í kring, þ.e. starfsemi Borgarspítalans, og mögulegri framtíðarnotkun hans, og öldrunarþjónustunni við Sléttuveg. „Ný byggð á svæðinu gæti að hluta verið framhald af þeirri starfsemi og íbúðabyggð sem þar er að finna í bland við íbúðir ætlaðar fyrir almennan markað.“
Sú afmörkun sem sýnd er á svæðinu í skipulagslýsingunni tekur einungis til lóðar borgarinnar neðan við Borgarspítalann. Að mati íbúaráðsins er hins vegar eðlilegt að svæðið sem væri til skoðunar væri víðfeðmara og tæki einnig til lóðar Borgarspítalans og aðliggjandi gatna. „Með flutningi á núverandi starfsemi Borgarspítalans niður á Hringbraut er ljóst að finna þarf nýja notkun fyrir húsnæði spítalans. Fyrirhuguð samkeppni gæti verið liður í því að skoða hver sú notkun á að vera um leið og horft verði með opnum hug hvort frekari tækifæri til uppbyggingar sé á lóð spítalans.“
Athugasemdir