Aldrei fleiri morð á Íslandi - þrjú börn látin á árinu

Ídag greindi lög­reglan á höf­uð­borg­ar­svæð­inu frá því að 10 ára stúlka hefði fund­ist látin í hraun­inu við Vatn­s­karðs­námu á Krýsu­vík­ur­svæð­inu í gær­kvöldi. Faðir hennar, íslenskur karl­maður á fimm­tugs­aldri, hefur verið úrskurð­aður í gæslu­varð­hald til 24. sept­em­ber á meðan rann­sókn stendur yfir. Hann er grun­aður um að hafa banað dóttur sinni. 

Samkvæmt til­kynn­ingu frá lög­regl­unni á höf­uð­borg­ar­svæð­inu hringdi mað­ur­inn sjálfur í Neyð­ar­lín­una til að kom­ast í sam­band við lög­reglu. Þegar við­bragðs­að­ilar komu á stað­inn var reynt að end­ur­lífga stúlk­una. Til­raunir báru þó ekki árangur og stúlkan var úrskurðuð látin á vett­vangi. Samkvæmt upp­lýs­ingum Heim­ild­ar­innar hefur mað­ur­inn áður kom­ist í kast við lögin. 

Atburð­ur­inn er sjötta morð­málið sem ratar inn á borð íslensku lög­regl­unnar á þessu ári. Fórn­ar­lömbin eru nú orðin sjö tals­ins, þar af eru þrjú börn látin. Áður var hæsti fjöldi morða á einu ári fimm. 

Árin 1999-2019 voru að með­al­tali tæp 1,9 mann­dráp á ári. Fyrir árin 2020-2024 er það með­al­tal hins vegar komið upp í 4,6 mann­dráp á ári. Flest morð hafa verið framin í ár, eða sjö. Næst­flest, eða fimm, voru framin árin 2000, 2020 og 2023. 

Grímur Grímsson, yfir­maður mið­lægrar rann­sókn­ar­deildar lög­regl­unnar, sagði í sam­tali við Heim­ild­ina fyrr í mán­uð­inum að það væri afar sjald­gæft að börn væru myrt. Fjöldi fórn­ar­lamba á barns­aldri er því óvenju­legur. 

Sex atvik það sem af er ári

Fyrsta morð­málið sem kom á borð lög­reglu árið 2024 var þann 31. jan­úar. Þá fannst sex ára drengur lát­inn að heim­ili sínu að Nýbýla­vegi í Kópavogi. Fimmtug móðir hans var í kjöl­farið ákærð fyrir mann­dráp. Hún hefur játað á sig verkn­að­inn.

Þá fannst þann 20. apríl lit­háískur maður á fer­tugs­aldri lát­inn í sum­ar­húsi í Kiðja­bergi, sem er í upp­sveitum Árnes­sýslu. Annar Lithái er grun­aður um að hafa orðið honum að bana.

Tveimur dögum síðar, þann 22. apríl, fannst fimm­tug kona látin í íbúð­ar­húsi á Akureyri. Sam­býl­is­maður hennar, sem er á sjö­tugs­aldri, hefur verið ákærður fyrir mann­dráp.

Þann 22. ágúst fund­ust hjón á átt­ræð­is­aldri látin að heim­ili sínu í Nes­kaups­stað. Síðar þann dag var maður hand­tek­inn á Snorra­braut í Reykja­vík vegna máls­ins og farið var fram á gæslu­varð­hald yfir honum. 

Á menn­ing­arnótt, 24. ágúst, réðst 16 ára piltur á þrjú ung­menni með hnífi í miðbæ Reykja­víkur. Viku síðar lést hin 17 ára gamla Bryndís Klara Birg­is­dóttir af sárum sínum. Dreng­ur­inn sætir nú gæslu­varð­haldi í fang­els­inu á Hólms­heiði.