„Hefði ég ekki verið búin að njóta þeirra for­rétt­inda að lesa stefnu­ræðu for­sæt­is­ráð­herra áður en hann flutti hana hér áðan þá stæði ég ekki hér – ég lægi senni­lega í yfir­liði í sæt­inu mínu. Því því­líkt froðu­flóð sem flæðir út um allar koppa­grundir.“

Þetta hafði Inga Sæland, for­maður Flokks fólks­ins, að segja um nýflutta stefnu­ræðu Bjarna Bene­dikts­sonar for­sæt­is­ráð­herra í þing­sal í kvöld.

Inga sagði það með hreinum ólík­indum að Bjarni hefði talað um að á Íslandi væri kaup­máttur hvað mestur, jafn­vel meiri en í löndum sem Ísland bæri sig saman við.

„Hverjum dettur í hug að trúa þessu bulli? Er eitt­hvað sam­bæri­legt að miða hér við okur­vexti og þann hryll­ing sem sam­fé­lagið okkar er að ganga í gegnum við verð­bólgu sem engin bönd hafa náðst utan um – að bera það saman við önnur lönd sem hafa far­sæl­lega kveðið verð­bólgu­draug­inn í kút­inn á ótrú­lega skömmum tíma?“

Inga sagði það litla huggun fyrir heim­ilin þótt hús­næði hækk­aði í verði. „Við erum ekki að fara að selja ofan af okkur þakið nema nauð­syn krefur til að inn­leysa þennan upp­safn­aða hagnað, er það? Við étum ekki stein­steypuna, er það?“

Mynd: Golli

Kristrún kallaði ríkisstjórnina kærulausa

Inga var ekki sú eina sem gagn­rýndi hag­stjórn rík­is­stjórn­ar­innar í umræðum um stefnu­ræðu for­sæt­is­ráð­herra. Kristrún Frosta­dóttir, for­maður Sam­fylk­ing­ar­innar, sagði rík­is­stjórn­ina hafa gerst seka um óaf­sak­an­legt kæru­leysi. Hún forð­að­ist að taka ábyrgð á efna­hags­á­stand­inu og benti á Seðla­bank­ann, verka­lýðs­hreyf­ing­una og erfða­mengi Íslend­inga.

Vísaði hún þar til nýlegra ummæla Sigurðar Inga Jóhanns­sonar um að það væri í DNA Íslend­inga að sætta sig við háa verð­bólgu.

„Kæru­leysið, aðgerða­leysið og ábyrgð­ar­leysið er óaf­sak­an­legt. En nú koma þessir sömu stjórn­mála­menn og segja: Þetta er allt að koma. Eftir öll þessi ár. Og hæst­virtur for­sæt­is­ráð­herra segir að rík­is­stjórnin hafi, með leyfi for­seta, stutt ötul­lega við hjöðnun verð­bólg­unnar,“ segir Kristrún. 

Þor­gerður Katrín Gunn­ars­dóttir, for­maður Við­reisnar, sagði í sinni ræðu að stjórnin léti sem ekk­ert væri þrátt fyrir að fólk berð­ist við dýra mat­ar­körfu og há hús­næð­is­gjöld.

„Jarð­teng­ingin er raunar svo brengluð að í vor sagði hæst­virtur for­sæt­is­ráð­herra, í þess­ari pontu, að Ísland væri í bestu efna­hags­legu stöðu í lýð­veld­is­sög­unni. Ekki veit ég við hvaða fólk eða fyr­ir­tæki ráð­herr­arnir í þess­ari rík­is­stjórn eru að tala. En þetta er ekki sú staða sem blasir við venju­legu fólki þegar það opnar heima­banka sinn.“ 

Sagði Þor­gerður Katrín að stað­reyndin væri sú að rík­is­stjórnin færi óvar­lega í pen­inga­málum og heim­ilin borg­uðu brús­ann í formi ofur­vaxta og verð­bólgu. „Þetta þarf ekki að vera svona,“ sagði hún.