Hópur Íslendinga hefur ákveðið að blása til mótmæla á Austurvelli klukkan þrjú síðdegis á sunnudag vegna fyrirhugaðrar brottvísunar hins ellefu ára gamla Yazans Aburajab Tamimis og foreldra hans, Mohsen og Ferial. Þau komu hingað í leit að hæli í fyrra. Yazan, sem er frá Palestínu, er með vöðvarýrnunarsjúkdóminn duchenne og hafa læknar vottað fyrir það að hann muni hljóta skaða af ef hann fær ekki viðeigandi læknismeðferð.
Kærunefnd útlendingamála hafnaði beiðni fjölskyldunnar um endurupptöku hælisumsóknar þeirra síðastliðinn föstudag og því vofir brottvísun til Spánar, hvar fjölskyldan er ekki með hæli, yfir í byrjun júlí.
Kristbjörg Arna Elínudóttir Þorvaldsdóttir, vinkona fjölskyldunnar, er ein af þeim sem stendur að mótmælunum.
„Þetta er rosalega illa gert finnst okkur. [...] Það er verið að segja að það sé allt í lagi fyrir hann að vera brottvísað en við erum með yfirgnæfandi læknisfræðileg gögn sem sýna fram á að brottvísun getur stytt líf hans. Þótt að það sé kannski til aðstoð á Spáni þá er flutningurinn, flugið sjálft og biðin gríðarlega hættuleg,“ segir Kristbjörg sem bendir á að það geti verið manneskju með duchenne mjög hættulegt að verða fyrir hnjaski, sem getur vel átt sér stað í flugvél.
„Við erum búin að reyna svo mikið en það gengur ekkert þannig að við þurfum bara að sýna að okkur standi ekki á sama og erum að styðja við Yazan. Hann hefur lýst því sjálfur að honum líður eins og enginn á Íslandi vilji hafa hann hérna. Þó að mótmælin skili ekki neinu varðandi [Kærunefnd útlendingamála] þá eru mótmælin tækifæri til þess að sýna honum að það er fólk sem vill hafa hann hérna, hann er ekki einn.“
Himnaríkið ísland
Yazan og fjölskylda hans sögðu ítarlega frá aðstæðum sínum í viðtali við Heimildina fyrir um mánuði síðan. Þá sagði Yazan að hann hefði verið boðinn velkominn í Hamraskóla frá fyrsta degi og að þar liði honum vel.
„Þið hljótið að hafa farið með mig til himnaríkis,“ sagði Yazan við foreldra sína.
Aðstandendur fjölskyldunnar hér á Íslandi hafa reynt hvað þeir geta til þess að halda honum í þessu himnaríki.
Duchenne samtökin, ÖBÍ, Einstök börn, Þroskahjálp, samtökin Réttur barna á flótta og Ungmennaráð Unicef hafa öll sent frá sér yfirlýsingu þar sem brottvísuninni er mótmælt og þá voru sálfræðingur, kennarar og þroskaþjálfi sem þekkja til Yazans á meðal þeirra sjö sem skrifuðu undir mótmælayfirlýsingu sem þau sendu Heimildinni. Undir hana skrifa einnig vinir Yazans hér á Íslandi.
„Við lýsum yfir þungum áhyggjum vegna yfirvofandi brottvísunar Yazan og foreldra hans frá Íslandi,“ segir í yfirlýsingunni þar sem farið er yfir mál Yazans. „Frá komu þeirra hafa þau orðið hluti af samfélagi okkar og lagt sitt af mörkum þrátt fyrir að standa frammi fyrir fjölmörgum hindrunum.“
Kristbjörg segir að aðstandendur fjölskyldunnar hafi jafnframt farið á fund í mennta- og barnamálaráðuneytinu en fengið þar þau svör að ráðuneytið gæti ekkert aðhafst í málinu.
„Ég myndi segja að flestir séu með okkur í liði og vilja ekki að þetta sé niðurstaðan,“ segir Kristbjörg.
„Viljum við í alvöru vera ábyrg fyrir því að stytta líf 11 ára drengs sem er nú þegar verulega stytt?“
Ræddi mál Yazans á Alþingi
Gísli Rafn Ólafsson, þingmaður Pírata gerði stöðu Yazans að umtalsefni sínu á Alþingi í dag.
„Yazan og foreldrar hans flúðu heimili sitt í Palestínu í leit að skjóli og öryggi á Íslandi fyrir ári síðan. Frá komu þeirra hafa þau orðið hluti af samfélagi okkar og lagt sitt af mörkum þrátt fyrir að standa frammi fyrir fjölmörgum hindrunum. Áður en Yazan kom til Íslands hafði hann hvorki aðgang að viðeigandi læknisþjónustu né fékk að taka þátt í skóla- og frístundastarfi,“ sagði Gísli.
„Nú á að brottvísa honum til Spánar, lands sem hann og fjölskylda hans hafa aldrei dvalið í. Með því gæti orðið hlé á þjónustu í allt að 18 mánuði, 18 mánuði sem munu valda óafturkræfum skaða sem minnka verulega lífsgæði hans og stytta líf hans. Það að veita honum vernd hérlendis er ekki aðeins aðkallandi mannúðarskylda heldur einnig mál upp á líf og dauða fyrir Yazan.“
Spurð hvers vegna hún hafi ákveðið að standa við bakið á fjölskyldunni segir Kristbjörg:
„Í fyrsta lagi er þetta yndisleg fjölskylda og ótrúlega góðhjörtuð. Það er augljóst hvað foreldrar hans eru að gera allt til þess að reyna að gera lífið hans bærilegt. Það er svo augljós væntumþykja hjá þeim. Ég er að útskrifast núna sem þroskaþjálfi og ég hef mikla reynslu af því að starfa með fötluðu fólki og börnum.“
Hún segist því furðu lostin á því að það eigi að vísa Yazan úr landi þar sem hann er 11 ára gamall, fatlaður og með sjúkdóm sem almennt styttir æviskeið fólks verulega.
„Af hverju má hann ekki njóta þess sem hann á eftir hamingjusamur hér?“
Gísli Rafn tók undir þetta á þingi í dag.
„Það eru nákvæmlega svona tilvik sem við viljum geta tekið tillit til af mannúðarsjónarmiðum þegar kemur að því að veita vernd en núverandi ríkisstjórn hefur gert ókleift. Viljum við í alvöru vera ábyrg fyrir því að stytta líf 11 ára drengs sem er nú þegar verulega stytt?“
Flóttamenn
Hvað gerðist raunverulega í Ceuta?
ESB fundar með talibönum um endursendingu hælisleitenda
Verður brottvísað í næstu viku
Fá ekki að læra hér frekar en í Afganistan
Segir nýju útlendingalögin notuð í „skipulagða herferð“
Athugasemdir (2)