„Þessi ákvörðun veldur von­brigðum því þetta eru algjör­lega til­gangs­lausar veiðar,“ segir Árni Finnsson for­maður Nátt­úru­vernd­ar­sam­taka Íslands um ákvörðun mat­væla­ráð­herra að heim­ila veiðar á lang­reyðum í sumar. Hann segir þó fyr­ir­komu­lagið skárra en það hefur verið sökum þess að aðeins megi veiða 99 dýr, en ekki 161 eins og tíðkast hefur.

Árni segir leyf­is­veit­ing­una vera hreyf­ingu í rétta átt. Hún lýsi meiri skiln­ingi en verið hefur. „Við erum ánægð með það. Hins vegar eru 99 dýr 99 dýrum of mörg. Þetta er í átt­ina en ekki nógu gott.“

Óábyrg framsetning

Árni telur fram­setn­ing­una í til­kynn­ingu mat­væla­ráð­herra sem birt­ist fyrr í dag vill­andi. Þar er sagt að leyfi verði til veiða á 99 dýrum milli Íslands og Græn­lands en 29 dýrum á milli Íslands og Færeyja.

„Mér finnst óábyrgt að blanda þessu saman. Ef það ætti að veiða 29 lang­reyðar á svæð­inu milli Íslands og Færeyja er alltof langt að sigla með dýrin til hval­stöðv­ar­innar,“ segir Árni. En ekki mega líða meira en 24 tímar frá því að dýr er drepið þangað til að það kemur í hval­stöð­ina.

„Þau dýr eru aldrei að fara að veið­ast og munu ekki nást. Ég skil ekki af hverju það er verið að setja þetta upp eins og þetta sé meira en það er,“ segir Árni.

„Þetta er dálítið sér­t­sakt að ein rík­asta þjóð heims skuli ekki sjá sér hag í því að hlífa þessum dýrum,“ bætir hann við. Enginn til­gangur sé með þeim. Hvalur hf. hafi tapað gríð­ar­lega á þessu, enda lít­ill mark­aður fyrir hval­kjöti. „Þetta eru til­gangs­lausar veiðar til að full­nægja kröfum eins manns – þetta er sér­kenni­leg þrá­hyggja, hval­veiðar Krist­jáns Lofts­sonar.“ 

Raun­veru­legar ógnir steðji að haf­inu – súrnun sjávar, mengun, lofts­lags­breyt­ingar og hlýnun hafs­ins. „Þetta eru allt vanda­mál sem þarf að leysa. Og við stundum hval­veiðar,“ segir for­mað­ur­inn.

Lítill áhugi fyrir stöðvun hvalveiða í þinginu

Spurður hvað honum finn­ist um rök­semda­færslu ráð­herra – að henni hugn­ist ekki endi­lega ákvörð­unin en hún verði að fara að lögum – seg­ist Árni ekki vera viss hvort eina leiðin til að stöðva hval­veiðar sé að breyta lög­unum. Það sé þó örugg­lega best að gera það svo­leiðis. Vísar hann þar til álits umboðs­manns Alþingis um ákvörðun Svan­dísar Svav­ars­dóttur að fresta veið­unum síð­asta sumar.

Árni nefnir þá að lít­ill vilji sé fyrir því að banna hval­veiðar á þing­inu. Hann telur að eini flokk­ur­inn sem hafi almenni­lega áhuga á því séu Píratar.

Í til­kynn­ing­unni segir að ákvörðun mat­væla­ráð­herra taki mið af „var­færnum vist­kerf­is­stuðlum Alþjóða­hval­veiði­ráðs­ins.“ Árni segir að það þýði senni­lega að kvót­inn miði við það að stofn­inn fari ekki niður fyrir 60-72% af upp­runa­legri stærð. Þetta séu þó flókin við­mið.