Sara Dögg Svanhildardóttir, bæjarfulltrúi Viðreisnar í Garðabæ, segir að minnihlutinn í bæjarstjórn sveitarfélagsins sé ekki hættur að gagnrýna ráðningu Lúðvíks Arnar Steinarssonar í starf sviðstjóra fjármála- og stjórnsýslusviðs. Sjálfstæðisflokkurinn er með meirihluta í bænum og hefur lengi Lúðvík Arnar lengi verið starfandi innan flokksins. Hann var valinn fram yfir Þóru Hjaltested, bæjarritara í Mosfellsbæ, en í ráðningarferlinu stóð valið á milli þeirra. Bæjarstjórinn, Almar Guðmundsson, vék sæti í ráðningarferlinu en þeir Lúðvík Örn eru vinir. 

Sara Dögg segir við Heimildina að bæjarfulltrúar Sjálfstæðisflokksins virðist ekki skilja gagnrýni minnihlutans á ráðninguna.„Við eigum við pólitískan ágreining um mikilvægi gagnsæis í ráðningum sem þessu. Ég batt vonir við að fulltrúar meirihlutans myndu vilja draga einhvern lærdóm af þessu ferli og rýna þær reglur sem sveitarfélagið vinnur eftir. Þær eru ekki gallalausar og eru ekki til þess fallnar að tryggja gagnsæi og traust því miður. En það var ekki hægt að skynja að það væri nokkur áhugi á því.“ 

Segir gagnsæi ekki skipta Sjálfstæðisflokkinn máli

Í svörum sínum til Heimildarinnar vísar Sara Dögg til álits embættis umboðsmanns Alþingis um ráðningar í embætti þegar hún er innt eftir stöðu málsins hjá minnihlutanum í Garðabæ. „Við höfum álit umboðsmanns Alþingis sem beinir því til sveitarstjórna að skýra ráðningaferli í æðstu embættisstöður vel. Það var ekki hægt að merkja nokkurn vilja til þess að líta í eigin barm og a.m.k. gangast við því að afhending gagna til bæjarfulltrúa hefði mátt vera með öðrum hætti fyrir bæjarstjórnarfund. Að þar hefði mátt gera betur til þess að mæta þeirri skyldu ber að virða þegar kemur að upplýsingagjöf vegna mála sem eru til afgreiðslu. Að ákvörðun sé byggð á gögnum. Á þetta hlusta bara ekki bæjarfulltrúar sjálfstæðisflokksins. Það er líkt og gagnsæi og traust skipti þau engu máli þegar kemur að veigamikill ákvörðum sem þessari.“

Heimildin hefur sent beiðni til Garðabæjar um að fá aðgang að gögnunum um ráðningarferlið og rökstuðning fyrir því af af hverju Lúðvík Örn var ráðinn fram yfir Þóru Hjaltested. Beiðni miðilsins er í vinnslu hjá Garðabæ. 

Eitt af því sem Almar Guðmundsson bæjarstjóri hefur ekki gert í málinu, þrátt fyrir að Sara Dögg hafi beðið hann um það á bæjarstjórnarfundi, að gera grein fyrir því af hverju hann vék sæti í málinu. Þetta hefur Almar enn ekki gert með beinum hætti. Í svari frá Garðabæ um þetta segir hins vegar; „Þegar starfið hafði verið auglýst upplýsti bæjarstjóri bæjarráð um það að vegna tengsla við umsækjendur um starf sviðsstjóra fjármála- og stjórnsýslusviðs hafi hann ákveðið að víkja við undirbúning og meðferð málsins.“

Björg Fenger, formaður bæjarráðs, kom að ráðningunni í stað Almars. 

Hefur ekki útskýrtAlmar Guðmundsson bæjarstjóri hefur ekki útskýrt af hverju hann vék sæti í málinu.

Mynd: Sjálfstæðisflokkurinn

Þóra ætlar ekki að tjá sig

Heimildin hefur haft samband við Þór Hjaltested til að fá sýn hennar á ráðningu Lúðvíks Arnar og eins til að svara því hvort hún hyggist leita réttar síns í málinu. Þór vill hins vegar ekki tjá sig um málið: „Ég er ekki á landinu en ég hyggst ekki tjá mig um þetta mál.“

Þóra vill þráspurð ekki svara því hvort hún ætli að leita réttar síns í málinu gagnvart Garðabæ eða ekki. 

Í svari frá Garðbæ kemur fram að samstaða hafi verið um ráðningarferlið hjá meirihlutanum og minnihlutanum. „Í fundargerðum bæjarstjórnar og bæjarráðs kemur fram að samstaða var hjá meirihluta og minnihluta bæjarstjórnar um ráðningarferlið á öllum stigum. Þar á meðal að formaður bæjarráðs tæki stöðu bæjarstjóra.“