Talsmaður eiganda húsnæðisins í Stangarhyl 3, þar sem karlmaður lést í bruna í síðustu viku, segir að maðurinn sem lést hafi hlaupið aftur inn í eldsvoðann í leit að vini sínum með þeim afleiðingum að hann lést. Maðurinn hafi hlaupið inn vegna þess að hann hafi ekki séð vin sín komast út úr húsinu, sem hann þó gerði.
Eigandi húsnæðisins er fjárfestingarfyrirtækið Alva Capital. Heimildin setti sig í samband við Alva Capital og spurði forsvarsmenn fyrirtækisins nánar út eldsvoðann, íbúana og hvort að eldvörnum hafi verið nægilega vel sinnt.
„Þetta er gríðarlegur harmleikur og áfall fyrir okkur öll. Við þekktum þennan mann vel persónulega sem vinnufélaga“
Í svörum Örvars Rafnssonar, talsmanns Alva Capital, við fyrirspurn Heimildarinnar segir að fyrirtækið hafi keypt eignina Stangarhyl 3 og 3A um mitt ár 2022. Húsið hafi verið innréttað sem 12 stúdíó íbúðir, 25 herbergi með sameiginlegu eldhúsi ásamt einni stærri 135 fermetra fimm herbergja íbúð. Stærri íbúðin hafi verið sú sem brann.
„Þetta er gríðarlegur harmleikur og áfall fyrir okkur öll. Við þekktum þennan mann vel persónulega sem vinnufélaga,“ segir í svarinu.
Þá segir Örvar að fyrirtækið hafi sinnt eldvörnum, úttekt hafi verið gerð af slökkviliðinu skömmu eftir að fyrirtækið tók við húsnæðinu. Athugasemdir sem þar komu fram hafi verið teknar fyrir og þær lagaðar. Sömuleiðis hafi brunaviðvörunarkerfi húsnæðisins síðast verið tekin út af Öryggismiðstöðinni 25. október og að þeirra sögn hafi kerfið virkað vel.
Athugasemdir