Gríðarleg óánægja er meðal Íslendinga vegna hjásetu Íslands á þingi Sameinuðu þjóðanna um vopnahlé á Gaza, samkvæmt nýrri könnun Maskínu. Þar segjast 70,8% vera óánægð með hvernig Ísland ráðstafaði atkvæði sínu, þar af sögðust 58,5 vera mjög óánægð en 12,5 fremur óánægð. Aðeins 7,5% svarenda sögðust mjög ánægðir með hjásetuna. 

Nokkur munur er á afstöðu fólks eftir því hvaða flokk það myndi kjósa ef kosið yrði til Alþingis í dag. Þannig eru kjósendur Miðflokksins og Sjálfstæðisflokksins ánægðastir með hjásetuna, 38,8% kjósenda Miðflokksins segjast ánægðir en 38,1% kjósenda Sjálfstæðisflokks. 

Þegar litið er til kjósenda allra annarra flokka er yfir 50% óánægðir með að Ísland hafi setið hjá við atkvæðagreiðslu um vopnahlé á Gaza. Þegar kemur að kjósendum Sósíalistaflokksins eru 97,4% óánægðir með hjásetuna en 94% kjósenda Pírata.

Stjórnarþingmenn gegn ákvörðun Íslands

Allsherjarþing Sameinuðu þjóðanna samþykkti á neyðarfundi þann 27. október ályktun um tafarlaust vopnahlé fyrir botni Miðjarðarhafs. Sú ákvörðun Íslands að sitja hjá hefur verið harðlega gagnrýnd víða. Þingflokkur Vinstri grænna, eins þriggja stjórnarflokka, er þeirra á meðal og sjálfur forsætisráðherra, Katrín Jakobsdóttir.

Þá greindi Heimildin frá því fyrir helgi að tveir þingmenn Vinstri grænna, þær Jódís Skúladóttir og Steinunn Þóra Árnadóttir, eru meðal flutningsmanna þingsályktunartillögu sem lögð verður fyrir þingið í dag um að Ísland fordæmi aðgerðir Ísraelshers í Palestínu og kalli eftir tafarlausu vopnahléi af mannúðarástæðum. 

Karlar og eldra fólk ánægðara með hjásetuna

Heimilistekjur virðast ekki hafa mikil áhrif á afstöðu fólks. Þegar litið var til þeirrar breytu var alltaf meira en 65% sem voru óánægðir með hjásetuna, mest 79,4% þegar kom að tekjuhópum 500-799 þúsund á mánuði. 

Karlar voru ívið ánægðari með að Ísland hafi setið hjá en konur, eða 18,3% karla en 7,1% kvenna. 23% karla sögðust í könnun Maskínu vera í meðallagi sáttir við hjásetuna en 58,% óánægðir. Hlutfall óánægðra kvenna var hins vegar 84,7%.

Þá var nokkur munur á afstöðu þegar kom að aldri svarenda þar sem um 20% svarenda 50 ára og eldri voru ánægð með hvernig Ísland ráðstafaði atkvæði sínu vegna vopnahlés á Gaza. Í hópnum 18-29 ára voru aðeins 7,5% ánægð og 6,7% á aldursbilinu 30-39 ára.

Bjarni ítrekar ákall um mannúðarhlé

Bjarni Benediktsson, sem tók við embætti utanríkisráðherra í síðasta mánuði, tjáði sig um málið daginn eftir atkvæðagreiðsluna hjá SÞ. Þar ítrekaði hann að sendinefnd Íslands á allsherjarþinginu hafi kallað skýrt eftir mannúðarhléi til að tryggja tafarlausa mannúðaraðstoð til óbreyttra borgara á Gaza. Á fundinum hafi Jórdanía lagt fram ályktun um ástandið á svæðinu fyrir hönd ríkja Arabahópsins, en ályktunin hafi ekki verið bindandi. „Ísland studdi ályktunina að því gefnu að breytingartillaga Kanada yrði samþykkt, þar sem hryðjuverk Hamas yrðu jafnframt fordæmd. Samstaða náðist ekki um það á þinginu og sat Ísland því hjá ásamt á fimmta tug ríkja.“

Könnunin var lögð fyrir Þjóðgátt Maskínu sem er hópur fólks sem dreginn er með tilviljun úr Þjóðskrá, á netinu. Svarendur eru alls staðar að af landinu og á aldrinum 18 ára og eldri. Könnunin fór fram dagana 3.-7. nóvember og voru svarendur 1259 talsins.