Árum saman hefur Ísland verið í fararbroddi þegar kemur að háhraðatengingum til heimila og fyrirtækja eins og sjá má í nýútkominni skýrslu Fjarskiptastofu, sem eftirlitsstofnanir fjarskipta á Norðurlöndum og í Eystrasalti birta árlega. Þar er samanburður á notkun helstu þátta fjarskiptaþjónustu í viðkomandi löndum og þróun hennar síðustu sex ár.

Heimild: Fjarskiptamarkaðir Norðurlanda og Eystrasaltsríkjanna 2022.

Mynd: Heimild: Míla

Samkvæmt þessari samantekt („Fjarskiptamarkaðir Norðurlanda og Eystrasaltsríkjanna 2022“) er Ísland áfram fremst þegar kemur að háhraðatengingum til heimila, með gagnahraða yfir 30 Mb/s og yfir 100 Mb/s og er í algjörum sérflokki þegar kemur að gagnahraða yfir 1 Gb/s. Einungis Danir eru að einhverju ráði farnir að bjóða 1 Gb/s hraða á heimilistengingum yfir ljósleiðara. 

Samkvæmt þessu eru íslenskir netrekendur og ekki síður neytendur leiðandi þegar kemur að hraða tenginga til heimila. Hér á landi er almennur nethraði yfir ljósleiðaratengingar til heimila allt að 1 Gb/s og býður Míla 1 Gb/s nethraða á ljósleiðaraheimtaugum um allt land. Nú hefur Míla tekið stórt skref inn í framtíðina, sem styður frekar það forskot sem Ísland hefur á alþjóðavísu í háhraðatengingum til heimila. 

10x vettvangur – Næsta kynslóð háhraðatenginga 

Þann 22. ágúst síðastliðinn tilkynnti Míla um nýjan vettvang fjarskipta – 10x vettvanginn, sem stendur fyrir tíföldun internethraða til heimila. Frá og með 1. október mun heimilum á höfuðborgarsvæðinu standa til boða 10x hraðari internettenging í gegnum sitt fjarskiptafélag. Í upphafi verður 2,5 Gb/s í boði fyrir  ljósleiðaratengd heimili á höfuðborgarsvæðinu og 10 Gb/s verður í boði á völdum svæðum. Þeim svæðum sem geta boðið 10 Gb/s mun svo fjölga jafnt og þétt, eftir því sem  öflugra burðarnet verður byggt upp. Í kjölfarið verður þjónustan færð yfir allt landið, eftir því sem uppfærsla burðarnets verður unnin. Sú áætlun verður gefin út síðar. 

Bandvíddarþörf eykst um 20-30% á ári

10x er vettvangur fyrir fjarskiptafélögin til að bjóða þjónustu sem getur vaxið með þörfum heimila og tryggt þeim næga bandvídd á hverjum tíma. Rík þörf er fyrir þessa framþróun. Bandvíddarþörf eykst stöðugt um 20-30 prósent á ári.

Æ fleiri tæki eru nettengd á heimilum, allt frá sítengdum eftirlitstækjum og ryksuguvélmennum til nettengdra ísskápa, allt frá 4K sjónvarpsstreymi til 8K eða hærri myndgæði leikjatölva ungmenna. Fjarvinna, sýndarveruleiki og gervigreind ásamt næstu kynslóð þráðlausra neta WiFi-7 með margfalt meiri afkastagetu en núverandi WiFi getur boðið, munu krefjast æ meiri hraða. Með 10x vettvanginum erum við tilbúin og flutningskerfið okkar verður ekki flöskuháls þegar kemur að upplifun notenda af nýrri tækni.

10x vettvangurinn er stórt stökk inn í framtíðina, því möguleikarnir sem opnast við það að svo bandbreiðar tengingar séu aðgengilegar eru óþrjótandi. Tífaldur internethraði ýtir undir nýsköpun, skapar ný tækifæri, skapar grundvöll fyrir framþróun víða, s.s. í heilbrigðiskerfinu, i skólakerfinu, í iðnaði og svo framvegis. Nýjar hugmyndir frjórra huga kalla á þennan veruleika. 

En 10x þróunin stoppar ekki við 10 Gb/s. Nú þegar er staðlavinna hafin að næstu kynslóðum – 25, 50 og 100 Gb/s hraða. Framþróun skapar nýjar leiðir og ný tækifæri og stefnan er stöðug fram á við. Við íslendingar ætlum áfram að vera brautryðjendur í fjarskiptum á Norðurlöndum og Eystrasalti. Sú forysta skiptir lífskjör á Íslandi miklu.