Ýmislegt gerðist við framleiðslu á Silfri Egils, sem síðar tók upp nafnið Silfrið þegar umsjónarmönnum þáttarins fjölgaði, sem rataði ekki fyrir framan myndavélarnar. 

Egill Helgason, sem hefur stýrt þættinum frá upphafi, en er nú hættur, segir frá því í forsíðuviðtali við Heimildina að eftirminnilegustu uppákomurnar, góðar og slæmar, hafi verið þegar hann varð sjálfum sér til skammar á einhvern hátt. „Þegar ég var á Skjá einum skáru þeir á þáttinn því hann var orðinn of langur. Það var aldrei hægt að fá mig til að fara úr loftinu svo þeir bara lokuðu allt í einu. Í reiðikasti henti ég út í sal klukku og könnu sem brotnaði, og Guðni Ágústsson keyrði mig heim og róaði mig,“ en Guðni hafði verið gestur í þættinum.

Síðan kom fyrir að fólk mætti í settið undir áhrifum áfengis. „Ég man eftir fólki sem kom fullt. Það gerðist alveg fyrstu árin að fólk mætti kannski undir áhrifum frá því kvöldið áður. Þetta var svolítið villt þarna á Skjá einum. Einhvern tímann þurfti ég að hringja í flokksformann og biðja hann um að leysa af þingmann sem kom undir áhrifum,“ segir Egill, sem vill ekki nefna nein nöfn. Þetta hafi síðan verið mun settlegra þegar þátturinn var kominn á RÚV og engum datt í hug að mæta fullur þangað. 

Eftir hrunið var Silfrið mikill brennipunktur fyrir alla umræðu því tengdu. Egill segir það hafa verið spennandi og skemmtilegan tíma. „Það var uppgjör í gangi. Ég myndi aldrei segja að allt sem maður hafi gert á þessum tíma hafi verið fullkomið, því margt var gert í hita leiksins og þegar ég horfi til baka var kannski ekki allt stórkostlega sniðugt. En þetta var spennandi tími og í raun var svolítið erfitt þegar honum lauk. Þegar þreytan kom. Eftir 2013 var komin mikil þreyta. Þá voru þegar orðin mikil vonbrigði með vinstri stjórnina, og allt einhvern veginn endaði í þreytu og stagli. Þarna voru samfélagsmiðlarnir líka komnir inn með sína tegund af pólitískri umræðu sem eitraði pólitíkina, pólaríseraði hana og lokaði fólk inni í sínum bergmálshellum. Ég sakna tímans fyrir þessa umbreytingu. Fólk er lokað af í sínum heimi og þessir heimar tala lítið saman. Fyrir vikið verður umræðan svo lítilfjörleg og bara leiðinleg.“

Áskrifendur geta lesið viðtalið við Egil í heild sinni hér.