Segir ekkert samtal eiga sér stað innan nefnda Alþingis

Helga Vala Helga­dóttir þing­maður Sam­fylk­ing­ar­innar segir að inn í nefnd­unum Alþingis eigi sér ekki stað neitt sam­tal um þau mál­efni sem þar rata inn. Þar bíði meiri­hlut­inn eftir skila­boðum frá til­teknum ráð­herra um hvað eigi að ger­ast. Þetta kom fram í máli þing­manns­ins undir liðnum störf þings­ins á Alþingi í dag. 

Hún hóf ræðu sína á að spyrja hvað það þýddi á rík­is­stjórn­ar­fundum að setja fyr­ir­vara við mál sam­ráð­herra. „Rík­is­stjórnin er jú ekki fjöl­skipað stjórn­vald en ég held að það sé óhætt að segja að ráð­herrar í annarri rík­is­stjórn Katrínar Jak­obs­dóttur séu að setja Íslands­met í að bera af sér stefnu hver ann­ars. Já, og yfir­leitt með orð­unum að rík­is­stjórnin sé ekki fjöl­skipað stjórn­vald. Hvers konar skila­boð eru það eig­in­lega til almenn­ings að vera svona ósam­mála í nán­ast öllum grund­vall­ar­málum?“ spurði hún enn frekar.  

„Þá er það einnig þannig að þegar þeim hentar þá kasta ráð­herrar ábyrgð sinni á þingið. Nýjasta dæmið er þegar hæst­virtur fjár­mála­ráð­herra var spurður út í stjórn­laus rík­is­út­gjöld án tekju­öfl­unar, ann­arrar en þeirrar að seil­ast ofan í vasa almenn­ings með jafnri krónu­tölu sem bitnar auð­vitað verst á þeim tekju­lægstu. Aðspurður hafn­aði ráð­herr­ann allri ábyrgð, sagði Alþingi fara með fjár­veit­inga­valdið og að það væri Alþingi sem tæki ákvörðun um hækkun útgjalda,“ sagði hún. 

Nefndarmenn „kyngi ælunni dag eftir dag“

Helga Vala sagði að þetta væri eig­in­lega með hreinum ólík­indum. „Ráðherra er með þessum orðum að blekkja almenn­ing. Við vitum að meiri­hluti inni í nefnd­unum situr og bíður til­lagna frá ráð­herra sínum og leggur svo fram í sínu nafni. Þetta ger­ist, frú for­seti, á hverju ein­asta ári við afgreiðslu fjár­laga og hefur núna smit­ast yfir á önnur mál.

Fyrst ég er byrjuð þá er auð­vitað ótrú­legt að heyra hvern ráð­herr­ann á fætur öðrum koma fram og segj­ast bíða breyt­ing­ar­til­lagna frá nefndum þings­ins, svona eins og til að fría sig frá stefnu sam­ráð­herra sinna. Inni í nefnd­unum, leyfi ég mér að upp­lýsa, á sér hins vegar ekki stað neitt sam­tal. Þar bíður meiri­hlut­inn eftir skila­boðum frá til­teknum ráð­herra um hvað eigi að ger­ast,“ sagði hún. 

Þing­mann­inum virð­ist sem ráð­herraræðið sé orðið svo algjört hjá meiri­hlut­anum að full­trúar hans í hverri fasta­nefnd­inni á fætur annarri „kyngi ælunni dag eftir dag“ í hverju mál­inu á fætur öðru – bara til þess að breiða yfir hvað þessi rík­is­stjórn sé brjál­æð­is­lega ósam­stiga. „Er ekki komið gott af þessu mála­mynda­hjóna­bandi?“ spurði hún að lokum.