Fyrri aukaspurning:

Hvað kallast sú tegund af skipum sem þarna sést?

***

Aðalspurningar:

1.  Hvaða þýska tónskáld samdi tilkomumikil verk um Niflungahringinn svonefnda?

2.  Denys Shmyhal er forsætisráðherra í Evrópulandi einu og hefur mætt mikið á honum síðasta árið. Það hefur verið harla erfitt. Hann er þó ekki valdamestur manna í sínu landi því æðsti þjóðhöfðingi landsins er valdameiri en hann. En í hvaða landi er Shmyhal forsætisráðherra?

3.  Verkalýðsfélagið Efling varð til við sameigingu eldri félaga — í nokkrum áföngum. En hvað af eftirtöldum félögum varð EKKI partur af Eflingu? Aldan — Dagsbrún — Framsókn — Iðja — Sókn.

4.  Ungur piltur átti góðan vin sem var björninn Balú. En hvað hét ungi pilturinn? 

5.  Hvað kallast á íslensku sá sjúkdómur (eða sjúkdómseinkenni) sem heitir á mörgum alþjóðlegum málum díarrea?

6.  Hvaða stóru eyju reyndu Bandaríkin að kaupa árið 1947? — þótt ekki muni sú hugmynd þá hafa komist nema rétt á rekspöl.

7.  Í hvaða landi er Ólátagarður?

8.  Hvaða áfengistegund er hið ameríska búrbon náskylt?

9.  Hanukkah er hátíð í ... hvaða trúarbrögðum?

10.  Hvað nefndist gríska þjóðsagnahetjan sem drap föður sinn og kvæntist svo móður sinni?

***

Seinni aukaspurning:

Konurnar tvær á myndinni hér að neðan eru systur og þær eru báðar í skrautlegum kjólum. En hvað eiga þær helst annað sameiginlegt?

***

Svör við aðalspurningum:

1.  Wagner.

2.  Úkraínu.

3.  Aldan.

4.  Móglí.

5.  Niðurgangur.

6.  Grænland.

7.  Svíþjóð.

8.  Viskíi.

9.  Gyðingdómi.

10.  Ödipus.

***

Svör við aukaspurningum:

Á efri myndinni er galeiða.

Á neðri myndinni eru systurnar Anna María og Margrét. Þær eru báðar (eða voru í tilfelli Önnu Maríu) drottningar. Það er eina rétta svarið!