Ásmundur Einar Daðason, mennta- og barnamálaráðherra, baðst afsökunar á því að yfirvöld hafi ekki hlustað á þolendur kynferðisbrota undanfarin ár. Afsökunarbeiðnin var sett fram í erindi sem hann hélt á fjölsóttum mótmælum við Menntaskólann í Hamrahlíð í gær.
Á meðal annarra ræðumanna voru þær Urður Bartels og Agla Elín Davíðsdóttir. Í samtali við Stundina hafna þær afsökunarbeiðni ráðherra. Urður segir að Ásmundur Einar hafi eingöngu beðist afsökunar því hann hafði enga aðra möguleika.
Aðspurð hvort hún taki afsökunarbeiðnina ekki gilda segir hún: „Nei, ég geri það ekki. Það er mitt álit að þau hefðu ekki beðist afsökunar ef við hefðum ekki látið í okkur heyra. Þau voru að biðjast afsökunar útaf því að núna hafa þau enga aðra möguleika. Nú þurfa þau að biðjast afsökunar. Ég persónulega tek ekki við þessari afsökunarbeiðni,“ segir Urður í samtali við Stundina.
Innt eftir áliti sínu á því hvað þarf að breytast í kerfinu segir hún að það þurfi fyrst og fremst að hlusta á þolendur. Á það hafi skort. „Fyrst og fremst að hlustað sé á þolendur, að mál þeirra sé tekin alvarlega,“ útskýrir hún. Þá vill hún að þolendur fái „loksins einhverjar breytingar á kerfinu. Því kerfið er ónýtt, það er brotið og það er löngu tímabært að fá fram breytingar,“ segir hún án þess að útfæra þær hugmyndir nánar. „Fá eitthvað nýtt,“ er krafan.
Telur þú að skólastjórnendur hafi brugðist nemendum með aðgerðarleysi?
„Í fyrstu hefði ég sagt já alveg hiklaust. Fyrstu viðbrögðin voru alls ekki nógu góð. Við fengum ekki að tjá okkur. Það var þaggað niður í okkur. En svo þegar þau sáu hvernig þetta var að breiðast út þá fóru þau að ýta undir það og fóru að hjálpa okkur. Ég myndi ekki segja að þau hefðu brugðist okkur, en fyrstu voru viðbrögðin alls ekki nógu góð.“
Telurðu að þessi mótmæli munu skila árangri?
„Ég tel að þau munu skila árangri. Ef þau gera það ekki þá höldum við áfram. Við munum halda áfram að berjast þangað til að við fáum breytingar í gegn.“
Afsökunarbeiðni er ekki nóg
Agla Elín Davíðsdóttir tekur undir með Urði og segist ekki taka við afsökunarbeiðni ráðherra fyrr en kröfum nemenda um breytingar verði mætt og kerfinu breytt. Afsökunarbeiðni sem slík sé ekki gild, ein og sér. „Hún er ekki gild fyrr en við sjáum að kröfum okkar sé mætt og að þessu kerfi og ferlum verði breytt til þess að almennilega sé tekið á kynferðisbrotamálum. Þessari afsökunarbeiðni verður ekki tekið fyrr en ráðherra geti tryggt að öryggi nemenda sé gætt,“ segir Agla.
Hverjar eru þínar kröfur?
„Að það verði hlustað á nemendur þegar þeir leggja fram kæru varðandi ofbeldismál. Að þeirra hagsmunir verði alltaf efst í huga og að það verði alltaf séð til að þeir séu verndaðir og að réttindi þeirra séu tryggð. Að gerendum verði vísað úr staðnámi svo þolendur þurfi ekki að sjá þá daglega. Að bæði þolendum og gerendur fá andlega aðstoð til þess að þau geti unnið úr málinu og að þau geti lært af sínum gjörðum.“
Aðspurð um hvort skólastjórendur hafi brugðist þolendum í þessum málum segir Agla að svo sé. „Já klárlega. Það eru bara allt of margir nemendur sem hafa nú þegar hrökklast úr námi og glímt við alvarleg andlega veikindi og fundið fyrir mikilli einsemd. Þeim líður að þeim hafi verið brugðist og það er klárlega kerfinu að kenna.“
Finnur þú fyrir miklum stuðningi í þessum aðgerðum ykkar.
„Já, rosalega miklum stuðningi. Það er ótrúlegt að svona margir hafi mætt. Það er ógeðslega skemmtilegt að sjá hversu margir standa við bakið á okkur. Það er auðvitað ekki gaman að við þurfum að vera að þessu, en það er samt fáránlega góð tilfinning að fá svona mikinn stuðning frá öllum nemendafélögum og nemendum um allt land sem hafa haft samband við okkur og sagst styðja við okkur.“
Athugasemdir