Fyrri aukaspurning:

Hvað heitir stúlkan hér að ofan? Myndin er ekki ný af nálinni.

***

Aðalspurningar:

1.  Þrjú ríki í Afríku heita í raun sama nafninu. Til að greina á milli þeirra er eitt þeirra kennt við höfuðborg sína, auk nafnsins sjálfs; annað ríki er kennt við staðsetningu sína á miðbaug, en það þriðja heitir þessu nafni einskæru. Og hvaða nafn er það?

2.  En svo eru tvö ríki í Afríku sem heita alveg sama nafninu, en greint er á milli þeirra með tilvísun til stjórnarfarsins — annað er kallað alþýðulýðveldi en hitt einfaldlega lýðveldi. Hvað heita þessi tvö ríki?

3.  Ýmsir hafa búið á Bessastöðum. Á árunum 1901-1908 bjó þar bóndi nokkur sem þó er kunnari sem stjórnmálamaður og ritstjóri áhrifamikils blaðs sem Þjóðviljinn kallaðist. Hvað hét bóndi?

4.  Kona bónda var líka kunn á sinni tíð og kannski ekki síst fyrir að endurvekja hið forna þuluform í íslenskum kveðskap. Hvað hét hún?

5.  Í einni kunnustu þulu hennar sagði: „Tunglið, tunglið, taktu mig / og berðu mig upp til skýja ...“ og hvernig var svo framhaldið?

6.  St.Péturborg í Rússlandi gekk undir öðru nafni á árunum 1914-1924. Hvaða nafn var það?

7.  Síðan fékk borgin þriðja nafnið 1924 og kallaðist svo til 1991. Á þeim tíma hét borgin ....?

8.  Í mars 1963 sendi hljómsveit ein frá sér lagið Please Please Me og öðlaðist lagið heilmiklar vinsældir. Hver var hljómsveitin?

9.  Plútó heitir hundur Mikka Mús. Hvernig er hálsbandið hans á litinn (að minnsta kosti lang, lang, langoftast)?

10.  Hvaða kaupstaður er í vesturátt frá Reykjavík?

***

Seinni aukaspurning:

Myndin er úr leiksýningu frá 1963. Þarna sjást Brynjólfur Jóhannesson og Helga Valtýsdóttir í hlutverkum sínum. En hver var höfundur leikritsins?

***

Svör við aðalspurningum:

1.  Gínea. Hinar tvær Gíneurnar í Afríku heita Gínea-Bissau og Miðbaugs-Gínea.

2.  Kongó.

3.  Skúli Thoroddsen.

4.  Theódóra Thoroddsen.

5.  „Hugurinn ber mig hálfa leið / í heimana nýja.“

6.  Petrograd.

7.  Leningrad.

8.  Bítlarnir.

9.  Grænt.

10.  Seltjarnarnes.

***

Svör við aukaspurningum:

Á efri myndinni er Kamala Harris, nú varaforseti Bandaríkjanna.

Á neðri myndinni er sem sagt sena úr Hart í bak eftir Jökul Jakobsson.