Sigurður Ingi Jóhannsson, innviðaráðherra og formaður Framsóknarflokksins, hefur játað að hafa látið óviðurkvæmileg orð falla um Vigdísi Häsler, framkvæmdastjóra Bændasamtaka Íslands, í kvöldverðarboði Framsóknar síðastliðið fimmtudagskvöld, 31. mars. Samkvæmt heimildum Stundarinnar spurði Sigurður Ingi hvort taka ætti mynd af honum „með þeirri svörtu“. Sigurður Ingi biðst asökunar á orðum sínum í færslu á Facebook.
„Lét ég óviðurkvæmileg orð falla í garð framkvæmdastjóra Bændasamtakanna. Á þeim orðum biðst ég innilegrar afsökunar“
„Ég er alinn upp við það og það er mín lífsskoðun að allir séu jafnir. Þess vegna hef ég tamið mér að koma jafnt fram við alla. En mér verður á eins og öðrum. Það þykir mér miður. Í kvöldverðarboði Framsóknar fyrir fulltrúa á Búnaðarþingi síðastliðið fimmtudagskvöld, lét ég óviðurkvæmileg orð falla í garð framkvæmdastjóra Bændasamtakanna. Á þeim orðum biðst ég innilegrar afsökunar. Í lífinu er maður alltaf að læra á sjálfan sig. Sárt er þó að sá lærdómur bitni á tilfinningum annarra,“ skrifar Sigurður Ingi.
Aðstoðarmaður Sigurðar Inga sagði ósatt
Yfirlýsing Sigurðar Ingi gengur þvert á það sem aðstoðarkona hans, Ingveldur Sæmundsdóttir, lét hafa eftir sér í DV í gær, sunnudaginn 3. apríl. Þar sagði Ingveldur að það væri af og frá að Sigurður Ingi hefði viðhaft rasísk ummæli í garð Vigdísar í umræddu boði. „Þetta er algjört bull,“ hafði DV eftir Ingveldi.
Vigdís greindi frá því í færslu á Facebook síðu sinni í hádeginu Ingveldur segði ósatt í þessum efnum. „Aðstoðarmaður ráðherrans var ekki við hlið hans þegar ummælin voru látin falla, eins og hún hefur haldið fram en myndir úr þessari myndatöku sýna það án alls vafa. Það er særandi þegar reynt er að gera lítið úr upplifun minni og þegar beinlínis rangar skýringar eru notaðar við það. Ég stend með sjálfri mér þegar kemur að þessu, ég veit hvað ég heyrði, ég veit hvað var sagt. Ég neita að bera ábyrgð á þeim orðum sem ráðherrann viðhafði í minn garð.“
Sagði Vigdís að ummæli Sigurðar Inga hefðu verið afar særandi, án þess að greina frá því hver þau hefðu verið. Hún skrifaði hins vegar: „Ég hef aldrei látið húðlit, kynþátt, kynferði eða annað skilgreina mig. [...]Ég stend með sjálfri mér þegar kemur að þessu, ég veit hvað ég heyrði, ég veit hvað var sagt. Ég neita að bera ábyrgð á þeim orðum sem ráðherrann viðhafði í minn garð. Duldir fordómar eru gríðarlegt samfélagsmein og grassera á öllum stigum samfélagsins. Þeir smætta verk einstaklinga og gjörðir niður í lit eða kyn.“
Athugasemdir (1)