Eftir frásögn Eddu Pétursdóttur í þættinum Eigin Konur í dag af landsþekktum kærasta sem hótaði henni að afhjúpa nektarefni af henni, hefur Frosti Logason, sjónvarpsmaður á Stöð 2, stigið fram og gengist við breytninni.
Edda sagðist í viðtali við Eddu Falak hafa verið óttaslegin í áratug eftir sambandið. Birt hafa verið samskipti þar sem hann hótaði að dreifa nektarmyndum af henni í refsingarskyni.
Frosti, sem er dagskrárgerðarmaður í þættinum Íslandi í dag, stýrði þættinum Ósýnilega fólkið á Stöð 2 og er í stjórn SÁÁ, segist ekki hafa gert sér grein fyrir því hvað hann hefði sagt og gert í fyrra sambandi.
„Í dag birtist viðtal við fyrrverandi kærustu mína sem ég átti í sambandi við á árunum 2009-2012 og var til umfjöllunar í Stundinni. Ég vil taka það skýrt fram að ég tek fulla ábyrgð á minni hegðun og rengi ekki upplifun hennar,“ segir Frosti á Facebook-síðu sinni.
„Samband okkar var ekki heilbrigt og framkoma okkar við hvort annað langt í frá til fyrirmyndar. Ég var á vondum stað á þessum tíma. Ég tók sambandsslit okkar mjög nærri mér og í kjölfar þeirra kom hryllilegt tímabil þar sem ég var haldinn þráhyggju og sagði og gerði hluti sem ég sé mikið eftir.“
Frásögn Eddu var fyrst og fremst af framgöngu Frosta eftir að sambandi þeirra lauk. Hún greindi þó frá því að fljótlega eftir að samband þeirra hófst hafi hann sakað han hana um að halda fram hjá sér. „Það átti ekki átt við nein rök að styðjast og ásakanirnar komu mér algerlega í opna skjöldu. Þetta versnaði þegar á leið og var orðið mjög þráhyggjukennt undir lok sambandsins,“ sagði Edda í dag.
Eftir að þau hættu saman upphófst tímabil þar sem hann sendi henni óheyrilegt magn tölvupósta og smáskilaboða, nánast daglega á tímabili. „Þá skapaðist einhverskonar umsátursástand. Hann sendi mér tölvupóst oft í viku til að byrja með þar sem hann sakaði mig um svik og fór fram á að ég kæmi heiðarlega fram við sig. Bréfunum fækkaði eftir því sem tíminn leið frá því við hættum saman en í um tæpt ár eftir sambandsslitin sendi hann hátt í 80 tölvubréf og fjölmörg sms. Í flestum eru einhverskonar hótanir og svo segir hann ógeðslega hluti um mig,“ sagði hún.
Í tæpt ár þurfti hún að þola langvarandi áreiti þar sem hann fór meiðandi orðum um hana og krafðist þess að hún bæði hann afsökunar á einhverju sem hann sakaði hana um, ellegar myndi hann birta kynferðislegar myndir og myndbönd af henni. Að lokum gaf hann upp dagsetningu og sagði ef hún hefði ekki brugðist við kröfum hans fyrir þann tíma myndi hann koma efninu í dreifingu. „Ef að ég verð ekki búin að fá neitt frá þér um að þér finnist leiðinlegt að hafa komið svona fram við mig þann 1. des næstkomandi mun ég túlka það þannig að þér sé skítsama um þetta allt. Þá mun ég láta allt gossa,“ sagði í einum tölvupósti frá honum, þar sem hann vísar í kynferðislegt myndefni af henni.
Edda virðist nánast aldrei hafa svarað þessum skilaboðum, en þó beðið hann um að hætta. Þegar það gerðist ekki leitaði hún til lögreglunnar sem varaði hana við því að kæra hann. Hótanirnar sátu hins vegar lengi í henni og í hún var hrædd í áratug. Óttinn hafði meðal annars þær afleiðingar að hún forðaðist staði þar sem hún gæti rekist á hann og lét lítið fyrir sér fara. Hún sagðist enn vera hrædd um að myndefnið gæti farið í dreifingu.
Frosti segist hafa eytt öllum samskiptum þeirra tveggja og ekki vitað á síðari árum hvað hann hafi sagt og skrifað.
„Með hjálp sálfræðings, þerapista og tólf spora samtaka hóf ég bataferil minn. Hluti af því ferli var að eyða öllum okkar fyrri samskiptum. Ég hef því ekki gert mér grein fyrir nákvæmlega hvað ég hafði sagt og skrifað á þessu tímabili fyrr en ég sá viðtalið við hana í morgun. Ég veit að ekkert getur bætt fyrir hegðun mína, það minnsta sem ég get gert er að gangast við því sem ég gerði og biðjast innilega afsökunar.“
Frásögn Eddu má sjá hér.
Athugasemdir (5)