Jóhannes Tryggvi Svein­björns­son með­höndl­ari var í dag dæmdur í eins árs fang­elsi fyrir að hafa nauðgað konu á nudd­stofu sinni árið 2012. Er það fimmta nauðg­unin sem Jóhannes fær dóm fyrir. 

Fimmtán konur kærðu Jóhannes til lög­regl­unnar á höf­uð­borg­ar­svæð­inu árið 2018 vegna kyn­ferð­is­brota. Gefin var út ákæra í fjórum málum en rann­sókn felld niður í ell­efu, þar á meðal því máli sem Jóhannes var nú dæmdur í.  Um er að ræða brot hans gegn Ragn­hildi Eik Árna­dóttur sem steig fram í við­tali við Stundina sum­arið 2020 og lýsti nauðg­un­inni.

Ragn­hildur Eik kærði nið­ur­fell­ingu rann­sóknar lög­reglu til rík­is­sak­sókn­ara árið 2020 og vís­aði rík­is­sak­sókn­ari mál­inu aftur til lög­reglu til rann­sóknar. Hér­aðs­sak­sókn­ari gaf 12. maí á síð­asta ári út ákæru í mál­inu. Athygli vakti að málið var rakið opnu þing­haldi en Ragn­hildur hafði lýst sinni skoðun að svo ætti að vera á meðan að Jóhannes fór fram á að þing­hald yrði lokað.

Sem fyrr segir er þetta fimmta nauðg­unin sem Jóhannes fær dóm fyrir en í jan­úar á síð­asta ári var hann dæmdur í fimm ára fang­elsi fyrir að hafa nauðgað fjórum konum sem leit­uðu til hans í með­höndlun. Þeim dómi var áfrýjað til Lands­réttar, sem í nóv­em­ber síð­ast­liðnum þyngdi refs­ingu Jóhann­esar Tryggva í sex ára fang­elsi.