Dagur B. Eggertsson mun gefa kost á sér til að leiða lista Samfylkingarinnar í komandi sveitarstjórnarkosningum í Reykjavík. Dagur segir að fyrir ári síðan hafi hann haft efasemdir um að fara fram á ný, ekki síst eftir að skotið var á bíl hans utan við heimili hans.

Dagur greindi frá ákvörðun sinni í Morgunútvarpinu á Rás 2 nú í morgun. Þar sagði hann að umrædd skotárás hefði haft veruleg áhrif á hann, meiri en hann hefði viljað viðurkenna fyrsta kastið. Þannig hafi hann hætt að fara út að ganga á kvöldin með eiginkonu sinni.

Spurður um hvaða mál hann myndi leggja áherslu á á nýju kjörtímabili sagði Dagur mörg stór mál þegar komin af stað og nefndi þar meðal annars samgöngur og skipulagsmál. Dagur var spurður hvort hann hefði áhyggjur af því að úrslit kosninganna gætu orðið með þeim hætti að hann myndi þurfa að sitja í minnihluta á næsta kjörtímabili, ef til að mynda Viðreisn kysi að starfa með Sjálfstæðisflokknum. Dagur sagðist ekki óttast að sú staða gæti komið upp en hann væri þó meðvitaður um þann möguleika. Hann hefði hins vegar ástríðu fyrir þáttöku sinni í stjórnmálum.

Dagur hefur setið í borgarstjórn í tæp tuttugu ár, var fyrst kjörinn árið 2002. Hann varð borgarstjóri árið 2007 en sat aðeins í eitthundrað daga þar eð meirihlutinn í borgarstjórn féll. Dagur var formaður Borgarráðs á árunum 2010 til 2014 en hefur setið sem borgaarstjóri frá kosningunum 2014.