Fyrri aukaspurning:

Í hvaða kvikmynd lék þessi roskni Suzuki-bíll?

***

Aðalspurningar:

1.  Usain Bolt á heimsmetið í 100 metra hlaupi karla. Frá hvaða landi er hann?

2.  En hvað er heimsmetið hans? Hér dugar einn aukastafur.

3.  Í fornum grískum þjóðsögum er greint frá viðureign hetjunnar Heraklesar við ættflokk hinna herskáu Amasóna. Hvað þótti óvenjulegt við þann flokk?

4.  Í sömu grísku þjóðsögum og goðsögum er og sagt frá kentárum svonefndum. Hvernig voru kentárar útlits?

5.  Gljúfurárjökull, Teigarjökull, Búrfellsjökull og Kvarnárjökull eru fjórir litlir jöklar, sem ekki eru ýkja þekktir. En hvar eru þeir?

6.  Hvaða ríki réðist inn í Pólland 17. september 1939?

7.  Alec Baldwin er bandarískur leikari eins og menn vita. Hann hefur undanfarin ár fengið töluvert lof fyrir hlutverk sitt sem ákveðinn valdamaður í gamanþáttunum Saturday Night Live. Hvaða valdamaður?

8.  Hvar í Reykjavík hafa hin svonefndu sjálfstæðu leikhús aðsetur?

9.  Hvað er stærsta úthaf Jarðar?

10.  Brúðuheimilið, Fröken Júlía, Hedda Gabler, Pétur Gautur, Villiöndin og Þjóðníðingur — þetta eru allt leikrit skrifuð rétt fyrir aldamótin 1900 af norska leikritahöfundinum Henrik Ibsen. Og þó. Eitt þessara sex leikrita er eftir sænska leikritaskáldið August Strindberg. Og það er ... ?

***

Seinni aukaspurning:

Útlínur hvaða ríkis má sjá hér að neðan?

***

Svör við aðalspurningum:

1.  Jamaica.

2.  9,5.

3.  Hermenn Amasóna voru konur.

4.  Kentárar voru menn niður að mitti en hestar þar fyrir neðan.

5.  Á Tröllaskaga, milli Skagafjarðar og Eyjafjarðar. 

6.  Sovétríkin.

7.  Donald Trump.

8.  Tjarnarbíó.

9.  Kyrrahafið.

10.  Fröken Júlía.

***

Svör við aukaspurningum:

Efri myndin er skjáskot úr kvikmyndinni Agnes Joy.

Á neðri myndinni má sjá útlínur Kúbu.