Stjórnvöld hafa ekki náð markmiði sínu um að stytta biðlista eftir rýmum á hjúkrunarheimilum það sem af er ári. Biðlistar hafa lengst verulega undanfarinn áratug.
Þetta kemur fram í greinargerð embættis landlæknis um stöðu á biðlistum eftir hjúkrunarrýmum. Fjölgun á biðlistum frá upphafi árs 2011 til 2020 nemur 76 prósentum þegar tillit hefur verið tekið til mannfjölda. Árið 2011 var meðalfjöldi þeirra sem biðu í hverjum ársfjórðungi 158, en á fyrsta ársfjórðungi 2020 voru að meðaltali 366 á biðlista.
977 manns fluttust varanlega á hjúkrunarheimili á síðasta ári. Af þeim biðu 54 prósent skemur en 90 daga eftir hjúkrunarrými. Á fyrsta ársfjórðungi biðu 60 prósent skemur en 90 daga, en markmið stjórnvalda fyrir árið 2020 er að 65 prósent fái rými innan þeirra tímamarka.
Þetta er töluverð breyting frá árinu 2011 þegar 82 prósent þeirra sem fengu hjúkrunarrými biðu skemur en 90 daga. Þróunin hefur þó verið í rétta átt frá síðasta ári að mati embættisins. „Opnun nýrra hjúkrunarrýma á árinu 2019 og snemma árs 2020 á höfuðborgarsvæðinu virðist hafa haft jákvæð áhrif á bið, en eftir stöðuga fjölgun á biðlistum hafa þeir nú styst og biðtími einnig,“ segir í tilkynningu embættis landlæknis.
Alls er áætlað að opna 568 ný rými á landsvísu til ársins 2023. „Mikilvægt er að þessi rými verði opnuð til að stytta biðtíma enn frekar og koma í veg fyrir að einstaklingar þurfi að dvelja langdvölum á bráðasjúkrahúsi á meðan beðið er eftir rými,“ segir í greinargerðinni. „Eins og fjallað var um í ársuppgjöri embættisins 2018 varðandi bið eftir hjúkrunarrými hefur bið aldraðra á bráðasjúkrahúsi neikvæð áhrif á heilsu þeirra, færni og lífsgæði. Þá er meðhöndlun fólks á röngu þjónustustigi léleg nýting á fjármagni.“
Athugasemdir