Lögreglustjórinn á Suðurnesjum hefur óskað eftir því að gæsluvarðhald yfir manni, sem handtekinn var í kjölfar þess að sambýliskona hans fannst látin á heimili þeirra í Sandgerði, verði framlengt. Þetta staðfestir lögreglustjórinn á Suðurnesjum, Ólafur Helgi Kjartansson. Sagði hann rannsókn málsins miða áfram, slíkar rannsókn sé flókin og ómögulegt að segja til um hversu langan tíma taki að ljúka henni. Sagðist ekki geta veitt neinar frekari upplýsingar um málið. Gæsluvarðhaldið átti að renna út í dag.
Annar maður situr einnig í gæsluvarðhaldi, grunaður um að hafa myrt móður sína. Hún fannst látin á heimili sínu aðfaranótt 6. apríl síðastliðinn.
Bæði atvikin áttu sér stað í heimahúsum eftir að kórónaveirufaraldurinn braust út. Þekkt er að heimilisofbeldi aukist þegar aðstæður sem þessar eru uppi í þjóðfélaginu. Um það ræddi Sigþrúður Guðmundsdóttir, framkvæmdastýra Kvennaathvarfsins, þegar hún var gestur á upplýsingafundi COVID-teymisins á sunnudag. Sagði hún margt benda til þess að ofbeldi hafi aukist í samfélaginu eftir að kórónuveirufaraldurinn braust út.
Áslaug Arna Sigurbjörnsdóttir dómsmálaráðherra lýsti yfir áhyggjum af auknu heimilisofbeldi í pistli í Fréttablaðinu á mánudag. Sagði hún nauðsynlegt að tryggja öryggi þeirra sem búa við heimilisofbeldi. Hún hafi komið þeirri ósk á framfæri við Ríkislögreglustjóra að aðgerðir til að bregðast við heimilisofbeldi verði teknar til sérstakrar umræðu á fundi lögregluráðs í vikunni.
Sigríður Björk Guðjónsdóttir ríkislögreglustjóri hefur staðfest að tilkynningum um heimilisofbeldi hafi fjölgað að undanförnu. Það gerði hún þegar hún var gestur í morgunþætti Rásar 1 og 2 á dögunum. Þar talaði hún um þá staðreynd að tvær konur hafa látist á heimilum sínum eftir að faraldurinn braust út, þar sem grunur leikur á að þeim hafi verið ráðinn bani. Sagði hún að heimilisofbeldi hefði verið rætt á fundi ríkislögreglustjóra á Norðurlöndum í síðustu viku. Allir hefðu þeir lýst yfir áhyggjum af því að það væri að aukast.
Sigþrúður benti á ábyrgð samfélagsins. „Okkur ber að tilkynna til barnaverndar höfum við ástæðu til að ætla að barn búi við óviðunandi aðstæður,“ sagði hún. Að rétta þeim hjálparhönd geti skipt öllu máli.
Covid-19
Hópsýking greindist eftir þorrablót í Brúarási – Guðrún Hafsteinsdóttir meðal gesta
Mánagarðsbörnin orðin fimm á gjörgæslu – Rúmlega 40 börn hafa smitast
Inga Sæland með Covid: „Ljóta óværan þetta sem flæðir nú yfir sem aldrei fyrr“
Sanna greind með Covid-19: „Er ekki sú hressasta núna“
Steinunn Ólína ver vin sinn Kára: „Sjálfsábyrgðin er harður húsbóndi“
Athugasemdir