Sjúkrasjóðir stéttarfélaganna taka í síauknum mæli á sig verkefni sem heilbrigðiskerfinu ber að sinna samkvæmt lögum. Á sama tíma og fjármagn til Landspítala var skorið niður jókst kostnaður ríkisins vegna þjónustu einkarekinna læknastofa. 20-40% af kostnaði við heilbrigðiskerfið fer í súginn og heilbrigðiskerfið býður upp á of margar gagnslausar meðferðir. Forstjóri Landspítala kallar eftir þjóðarátaki í heilbrigðismálum.
Þetta er meðal þess sem fram kom á fundi um fjármögnun heilbrigðiskerfisins, sem haldinn var á vegum ASÍ og BSRB í morgun.
Drífa Snædal forseti ASÍ minntist þess í máli sínu að þegar Síminn var seldur hafi átt að byggja hátæknisjúkrahús fyrir söluandvirðið.
„Þeir peningar hafa væntanlega gufað upp í „money-heaven,“ sagði Drífa. „Hér á landi eru margfalt fleiri sem veigra sér við að sækja sér heilbrigðisþjónustu en í löndunum sem við berum okkur saman við, sagði hún. Ástæðan væri tekjutengd og það gæti haft alvarlegar afleiðingar að sinna ekki forvörnum.
„Þeir peningar hafa væntanlega gufað upp í „money-heaven““
Drífa sagði að sjúkrasjóðir stéttarfélaganna tækju sífellt meiri þátt í kostnaði sem ætti í raun að vera á ábyrgð hins opinbera. „Sjóðirnir eru í síauknum mæli að taka á sig ábyrgð heilbrigðiskerfisins,“ sagði Drífa sem sagði þetta slæma þróun og nefndi sem dæmi að margir slíkir sjóðir halda úti íbúðum í borginni fyrir langveika félagsmenn sína.
Einkarekstur sprettur upp eins og gorkúla
Eftir kreppu dró úr opinberri fjármögnun til heilsugæslunnar og á sama tíma jókst fjármagn til einkarekinna læknastofa. Þetta kom fram í máli Birgis Jakobssonar aðstoðarmanns Svandísar Svavarsdóttur heilbrigðisráðherra. „Þegar Landspítalinn dregur niður er eins og spretti upp gorkúla fyrir utan þetta sem veldur því að sparnaðurinn er takmarkaður,“ sagði Birgir.
„Við sátum uppi með mjög brotakennt kerfi. Sérfræðingar leituðu út fyrir Landspítalann til að sjá um sjúklinga sem áður höfðu verið á spítalanum. Þar fengu þeir oft betri vinnuaðstöðu, betri vinnutíma og hærri tekjur. Landspítalinn fór að veita minni þjónustu sem þýddi að þeir sjúklingar sem þurftu á þjónustu margra starfsstétta að halda fengu verri þjónustu, því þeir þurftu að sækja hana á margar starfsstöðvar úti í bæ. Framboðið af sérfræðingum hefur stýrt þessari þróun, ekki þarfir sjúklinga,“ sagði Birgir. Hann sagði það vera yfirlýsta stefnu ráðherra að snúa þessari þróun við.
Jafnmikil aukning til LSH og sérfræðilækna
Birgir fór yfir breytingar á ríkisframlagi til heilbrigðismála á milli áranna 2017 - 2020. Framlög til Landspítala hafa aukist um 11% á þessu tímabili og sama aukning hefur verið á framlögum til sérgreinalækna. Aukningin til heilsugæslunnar á höfuðborgarsvæðinu hefur verið 24%.
Athugasemdir