Sunna Valgerðardóttir, frétta- og dagskrárgerðarkona á RÚV, hefur verið ráðin til starfa hjá þingflokki Vinstri grænna. Í tilkynningu sem birt var á vef VG fyrir skömmu segist Sunna vera spennt fyrir starfinu.
„Það eru ótrúlega spennandi tímar fram undan í pólitíkinni og ég hlakka til að takast á við þá hinum megin borðsins. Blaðamennskunni fylgja þau forréttindi að geta bent á það sem betur má fara og látið svo aðra um að laga. Það er ekki auðvelt að segja skilið við þann dýrmæta skóla sem hefur kennt mér svo margt, en breytingar eru af hinu góða og þessi er tímabær.”
Sunna deildi tilkynningu VG í færslu á Facebook-síðu með stuttri yfirskrift: „Áfram gakk.“
Sunna hefur starfað í fjölmiðlum undanfarin 15 ár og hefur sérsvið hennar verið pólitískar fréttir. Lengst af hefur Sunna starfað hjá RÚV en á ferli sínum hefur hún komið við hjá fjölmiðlum á borð við Fréttablaðið, Kjarnann, fréttastofu Stöð 2, Vísis og Bylgjunnar þar sem hún sá um fréttaskýringarþáttinn Kompás.
Sunna hefur tvisvar sinnum unnið til Blaðamannaverðlauna fyrir störf sín. Fyrst árið 2012 og síðast árið 2022. Síðast vann hún verðlaun fyrir fréttaskýringar á miðlum Sýnar og RÚV. Þar sem hún fjallaði meðal annars um trúarofbeldi innan sértrúarsöfnuða og ópíóíðafaraldursins sem hér geisar hér á landi.
Athugasemdir