Helga Magnúsi Gunnarssyni vararíkissaksóknara er gróflega misboðið vegna þess stuðnings sem Laugarneskirkja sýndi tveimur írökskum hælisleitendum sem vísað var úr landi í síðustu viku. Hann telur réttast að Toshiki Toma, prestur innflytjenda, og Kristín Þórunn Tómasdóttir, sóknarprestur í Laugarneskirkju, verði áminnt vegna málsins.
Embættismaðurinn tjáir sig frjálslega um framtak Laugarneskirkju á Facebook og spyr hvort þjóðkirkjan sé hætt að virða landslög og ákvarðanir stjórnvalda. Vísar hann til þess að í síðustu viku fengu hælisleitendurnir Ali Nasir og Majed að bíða eftir lögreglu uppi við altari Laugarneskirkju ásamt vinum sínum og prestum sem veittu þeim andlegan stuðning þar til þeir voru handteknir, dregnir út úr kirkjunni og sendir til Noregs. Stundin fjallaði ítarlega um málið og birti myndband af lögregluaðgerðinni.
„Er þjóðkirkjan hætt að virða landslög og ákvarðanir stjórnvalda ? Eiga tilfinningar presta að ráða meiru en landslög. Á hvaða leið erum við ? Þetta er galið,“ skrifaði Helgi Magnús í færslu á Facebook-síðu sinni, sem opin er vinum hans, í síðustu viku. Þá bætti hann við: „Væntanlega eru þessir menn múslímar sem mundu ekki, að öllu jöfnu, láta sjá sig í kristinni kirkju nema í tilvikum sem þessum þar sem það þjónar hagsmunum þeirra.“ Eins og komið hefur fram í fjölmiðlum tóku Ali og Majed kristna trú skömmu áður en þeim var vísað úr landi.
Helgi fullyrðir að með framgöngu sinni hafi kirkjan ekki virt „löglegar ákvarðanir stjórnvalda byggðar á lögum“ og skrifar: „Þessir prestar telja sig vita betur og eiga að sýna mótstöðu gegn þessari ákvörðun. Þetta eru opinberir embættismenn sem ættu að mínu viti að fá áminningu í starfi fyrir þetta frumhlaup. Ég geri ekki athugasemd við að fólk lýsi skoðunum sínum eða mæti með potta og pönnur niður í innanríkisráðuneyti en að koma fram í starfi með þessum hætti í nafni þjóðkirkjunnar er galið að mínu viti.“
Á föstudaginn brást Helgi Magnús svo við frétt RÚV þar sem rætt var við Huga Hjaltason, prófessor í kirkjusögu, um kirkjugrið. „Hvaða dómsdags bull er þetta. Eigum við von á að kirkjan fari að boða annan ófögnuð sem fylgi henni á miðöldum eins og galdrabrennur og drekkingar kvenna sem eiga börn utan hjónabands? Ef þetta á að verða útbreitt framkvæmd hjá þjóðkirkjunni með stuðningi biskups eins og í þessu tilfelli þá mega þeir vita að þeir gera það ekki í mínu nafni því ég geng úr þjóðkirkjunni.:-(“
Kristín Þórunn Tómasdóttir, sóknarprestur í Laugarneskirkju, útskýrði nýlega í samtali við Stundina hver tilgangur framtaksins hefði verið. „Með því að hittast á þessari stundu í kirkjunni vorum við á táknrænan og raunverulegan hátt að sýna stuðning aðstæðum fólks á flótta - og líka að tjá von um að fornar venjur um kirkjugrið geti reynst tæki til að knýja yfirvöld um breytta stefnu í málefnum hælisleitenda, hætta færibandabrottvísunum fólks sem leitar eftir alþjóðlegri vernd á Íslandi og í staðinn taka ábyrga, efnislega afstöðu í einstökum málum,“ sagði hún og bætti því við að hún teldi brottvísun fólks sem leitar eftir alþjóðlegri vernd á Íslandi vera ranga, vonda, ábyrgðarlausa og í engu samræmi við þau gildi sem byggja ætti samfélagið á.
Brynjar Níelsson, þingmaður Sjálfstæðisflokksins, hefur sakað Kristínu og Toshiki Toma á Facebook um að hafa, með því að hýsa hælisleitendurna, reynt að koma í veg fyrir að lögregla gæti framfylgt lögum í landinu. Samkvæmt almennum hegningarlögum varðar það sektum eða fangelsi að tálma því að handhafi lögregluvalds gegni skyldustörfum sínum. Á meðal þeirra sem „læka“ færslu Brynjars á Facebook eru Helgi Magnús Gunnarsson og Ólafur Helgi Kjartansson, lögreglustjóri á Suðurnesjum.
Kristín Þórunn Tómasdóttir, sóknarprestur í Laugarneskirkju, furðaði sig á ásökunum Brynjars Níelssonar þegar Stundin ræddi við hana fyrr í dag. Hún sagði sig og Toshiki Toma hafa haldið dyrum kirkjunnar opnum fyrir tveimur hælisleitendum, staðið við hlið þeirra og sýnt þeim stuðning þegar lögreglan kom að sækja þá. Hún skildi ekki í hverju hindrunin á störfum lögreglu gæti mögulega verið fólgin og vísaði ásökunum þingmannsins til föðurhúsanna.
Facebook-hegðun Helga Magnúsar Gunnarssonar hefur áður vakið athygli og orðið tilefni fjölmiðlaumfjöllunar. Í lekamálinu svokallaða hélt verjandi Gísla Freys Valdórssonar, sakbornings í málinu, því fram að hlutlægnisskylda ákæruvaldsins hefði ekki verið virt við meðferð þess, meðal annars í ljósi þess að Helgi Magnús hefði „lækað“ færslu blaðamanns þar sem gert var gys að bloggaranum Páli Vilhjálmssyni og skrifum hans um lekamálið. Dómarinn hafnaði þeirri röksemd.
Flóttamenn
Hvað gerðist raunverulega í Ceuta?
ESB fundar með talibönum um endursendingu hælisleitenda
Verður brottvísað í næstu viku
Fá ekki að læra hér frekar en í Afganistan
Segir nýju útlendingalögin notuð í „skipulagða herferð“
Athugasemdir