Brunavarnir Suðurnesja hafa sætt harðri gagnrýni undanfarin misseri og þá sér lagi vegna meints bruðls. Sú gagnrýni beinist aðallega að slökkviliðsstjóranum Jóni Guðlaugssyni. Má þar nefna mikinn kostnað við yfirvinnu, bílahlunnindi Jóns, ráðningu skyldmenna hans í stöður hjá slökkviliðinu og vanskil á félagsgjöldum varaliðsmanna. Samkvæmt heimildum Stundarinnar á Suðurnesjum eru ákvarðanir Jóns Guðlaugssonar sem stjórnanda umdeildar innan slökkviliðsins sem og í stjórn Brunavarna Suðurnesja. Þrátt fyrir að gagnrýni beinist mikið að ýmsum ákvörðunum hans vildi Jón ekki tjá sig efnislega um þessa gagnrýni í samtali við Stundina.  

40 milljónir í yfirvinnu

Síðasta stjórn Brunavarna kallaði eftir óháðu mati á stöðu slökkviliðsins og fékkst ráðgjafar­fyrirtæki KPMG í það verk. Skýrsla KPMG um rekstur Brunavarna Suðurnesja dregur upp dökka mynd. DV hefur áður fjallað um þessa sömu skýrslu en í þeirri frétt kemur fram að fjölmiðlinum hafi ekki borist skýrslan í heild sinni, það vantaði fjórar öftustu síður skýrslunnar. Á þessum fjórum síðum komu fram tillögur KPMG til úrbóta í rekstri slökkviliðsins.

Stundin hefur undir höndum skýrsluna í heild sinni. Í skýrslu KPMG er birtur gífurlegur kostnaður vegna yfirvinnu árið 2013 sem var í heild 40 milljónir króna. Fram kemur að aðeins þrír starfsmenn séu á fastri yfirvinnu. Það eru topparnir þrír í slökkviliðinu; Jón Guðlaugsson slökkviliðsstjóri, Sigurður Skarphéðinsson aðstoðarslökkviliðsstjóri og Ómar Ingimarsson aðalvarðstjóri. Að sögn heimilda Stundarinnar innan slökkviliðsins má telja líklegt að nokkuð stór hluti þessara 40 milljóna renni til þeirra sem hafi fasta yfirvinnu þar sem yfirvinna almennra slökkviliðsmanna sé ekki svo mikil.