Þingmenn Viðreisnar hafa lagt fram frumvarp um að kosningaréttur útlendinga til sveitarstjórna á Íslandi verði áþekkur því sem tíðkast á hinum Norðurlöndunum.

Fyrsti flutningsmaður frumvarpsins er Pawel Bartoszek, en hann og Nichole Leigh Mosty þingkona Bjartrar framtíðar eru fyrstu innflytjendurnir sem kjöri á Alþingi. Ásamt Pawel standa að frumvarpinu þau Hanna Katrín Friðriksson, Jón Steindór Valdimarsson og Jóna Sólveig Elínardóttir.

Lagt er til að ríkisborgarar EFTA- og ESB-ríkja hljóti kosningarrétt strax við lögheimilisflutning en að ríkisborgarar ríkja utan EFTA og ESB öðlist kosningarrétt eftir að hafa verið búsettir á Íslandi í þrjú ár. Með þessu yrði staðan á Íslandi ámóta því sem tíðkast í Danmörku og Svíþjóð. 

Í greinargerð frumvarpsins er bent á að erlendir ríkisborgarar séu nú um 8 prósent allra íbúa Íslands. „Þeir greiða hér skatta og leggja mikið til uppbyggingar samfélagsins, margir þeirra munu svo að öllum líkindum öðlast íslenskt ríkisfang þegar á líður. Flutningsmönnum þessa frumvarps þykir rétt að gefa þessum hópi aukið vægi og aukin völd þegar kemur að ákvörðunum sem varða nærumhverfi hans.“ 

Fram kemur að á undanförnum árum hafi ríki Evrópu í auknum mæli veitt erlendum ríkisborgurum kosningarétt í kosningum á lægri stjórnsýslustigum.

„Norðurlönd veittu ríkisborgurum hvers annars kosningarrétt til sveitarstjórna fyrir nokkru, gjarnan með ákveðnum búsetuskilyrðum, en hafa öll fallið frá slíkum skilyrðum, að Íslandi undanskildu. Þá hafa Norrænu ríkin þrjú sem eru aðilar að Evrópusambandinu veitt ESB-borgurum sambærilegan rétt,“ segir í greinargerðinni. „Að mati flutningsmanna er rétt að færa kosningarrétt útlendinga til svipaðs horfs og annars staðar á Norðurlöndum.“