Jóhannes Hilmar Jóhannesson lést eftir árekstur við vörubifreið með tengivagn á mótum Reykjanesbrautar og Hafnarvegar á fimmtudagsmorgun. Jóhannes Hilmar var aðeins 34 ára gamall en hann lætur eftir sig sambýliskonu og þrjú börn. Vinir og vandamenn Jóhannesar Hilmars segja að hann hafi verið sannkallaður vinur vina sinna. Nú ætli þeir að standa við bakið á fjölskyldunni hans og þremur börnum, en þau eru fimm, níu og ellefu ára gömul. Hafa þeir hrundið af stað söfnun til styrktar fjölskyldunni.

„Allir sem voru það heppnir að þekkja þennan dreng vita hverslags öðlingur hann var. Vinur vina sinna og rúmlega það,“ segir Þorsteinn Pálsson, einn af vinum Jóhannesar Hilmars.

„Það eru erfiðir tímar framundan hjá fjölskyldunni hans og þess vegna ákváðum við, vinir fjölskyldunnar, að setja af stað þessa söfnun til þess að létta undir. Við viljum ekki að fjölskyldan hafi áhyggjur af fjármálum á sama tíma og hún gengur í gegnum þessa erfiðu tíma,“ segir Þorsteinn en styrktarreikningurinn er skráður á sambýliskonu Jóhannesar Hilmars, Jónu Rut Gísladóttur.

„Jóhannes var frábær fjölskyldufaðir, dugnaðarforkur og það var alltaf stutt í brosið hjá þessum ljúfa dreng. Svo má ekki gleyma því að hann var einstaklega einlægur og hjálpsamur þegar það kom að okkur vinunum. Við þökkum því með virðingu og gleðinni hans Jóa öllum þeim sem geta lagt hönd á plóg fyrir þessa yndislegu fjölskyldu sem missti svo mikið á fimmtudaginn.“

Upplýsingar um styrktarreikninginn:

Jóna Rut Gísladóttir 
Kennitala: 080282-3629 
Reiknings númer: 0542-14-405500