Sigurður Brynjar Jensson, einn þeirra sem var dæmdur fyrir aðild að frelsissviptingunni á Vogum á Vatnsleysuströnd, hefur verið ákærður á ný fyrir aðra frelsissviptingu, nú í Breiðholti. Sigurður Brynjar var dæmdur 20. júlí síðastliðinn fyrir Vogamálið og fékk hann 14 mánaða fangelsisdóm, þar af 12 mánuðir skilorðsbundnir. Atvikið sem hann er nú ákærður fyrir gerðist eftir þann dóm, eða 15. ágúst síðastliðinn. 

„Hafi þeir notað rafbyssuna í langan tíma, meðal annars á háls, maga og bak og kynfæri hans, með þeim afleiðingum að hann pissaði á sig.“

Í nýja málinu er Sigurður Brynjar ákærður ásamt öðrum manni sem ekki hefur fengið dóm í sambærilegu máli og verður því ekki nafngreindur hér. Sigurður Brynjar varð nítján ára á þessu ári en hinn maðurinn er talsvert eldri, fæddur árið 1988. Samkvæmt ákæru sviptu þeir stúlku á 19. ári og karlmanni á 22. ári frelsi sínu.

Notaði rafbyssu á kynfæri

Sá sem fékk þyngsta dóminn í Vogamálinu er Kristján Markús Sívarsson, oft kenndur við Skeljagranda, en hann fékk fjögurra ára og níu mánaða óskilorðsbundið fangelsi. Sigurður Brynjar bar þó, samkvæmt dómi, ábyrgð á mörgum hrottalegustu misþyrmingum málsins.