Draugmiðlarnir rísa
Þetta er absúrd. Stundin er nýbúin að birta úttekt á fjölmiðlaveldi Björns Inga og vafasaman uppruna þess og samdægurs kaupir Binginn fleiri gagnrýnar raddir í þeim tilgangi að þagga endanlega niður í þeim. Nú þegar DV hefur verið tekið úr umferð eru það Reykjavík Vikublað og Akureyri Vikublað sem bætast í flokk lifandi dauðra draugmiðla.
Einu sinni var Eyjan.is frjálslyndur miðill en er núna gróðrarspýja fyrir þvæl um ágæti fjárglæframanna og fordóma í bland. Einu sinni var DV gagnrýninn miðill sem kom upp um hneykslismál og valdníðslu ráðherra, helsta vígi rannsóknarblaðamennsku á Íslandi. Núna líkist blaðið helst rauðlitaðri útgáfu af mogganum+slúður.
Það er sorglegt að fylgjast með þessari marséringu. Einhvern veginn grunar mann að í hvert sinn sem einhver fjárfestir hætti sig út í að halda uppi almennilegri fjölmiðlun á Íslandi muni Björn Ingi birtast með tilboð sem ekki verði hægt að hafna. Algjörlega án þess að maður viti hvaðan peningarnir í tilboðið komi. Líkast til með láni frá eigendum sem borgað verður til baka með frekari lánum frá MP banka. Því ekki skilar fjölmiðlaveldið arði.
Það er heldur ekki markmiðið.
Athugasemdir